Թուրքիայի նախագահ Ռեջեփ Թայիփ Էրդողանի գլխավորած «Արդարություն և զարգացում» կուսակցությունը երեքշաբթի հայց է ներկայացրել Ստամբուլում կայացած տեղական ինքնակառավարման մարմինների ընտրությունների արդյունքները բողոքարկելու համար: Այս մասին հայտարարել է կուսակցության Ստամբուլի մասնաճյուղի ղեկավար Բայրամ Շենոջաքը:
«Ընտրությունների ժամանակ մենք կեղծիքներ և տարբեր խախտումներ ենք արձանագրել և այդ առումով ընտրությունների արդյունքները բողոքարկել ենք Ստամբուլի 39 շրջաններում»,- ասել է նա NTV հեռուստաալիքի եթերում:
Շենոջաքի խոսքերով, «Արդարություն և զարգացում» կուսակցության ստացած ավելի քան 2.5 հազար ձայնը չի գրանցվել:
ԿԸՀ-ի վերջին տվյալներով ՏԻՄ ընտրություններում Ստամբուլում «Արդարություն և զարգացում» կուսակցության թեկնածուները հաղթել են 24 շրջանում, ընդդիմադիր «Ժողովրդահանրապետական» կուսակցությանը՝ 14-ում: Քաղաքի մեկ շրջանում հաղթել է «Ազգայնական շարժում» կուսակցության թեկնածուն:
Այնուամենայնիվ, Ստամբուլի քաղաքապետի ընտրություններում մեծ թվով ընտրողներ քվեարկել են ոչ թե ԱԶԿ-ի առաջարկած Թուրքիայի նախկին վարչապետ Բինալի Յըլդըրըմի, այլ նրա հակառակորդ Աքրամ Իմամօղլուի օգտին:
Կուսակցությունը բողոքարկել է նաև Անկարայի ՏԻՄ ընտրությունների արդյունքները: «Մենք բողոքարկել ենք ընտրությունների արդյունքները Անկարայի 25 շրջաններում, 3217 քվեատուփի վերաբերյալ, որտեղ խախտումներ ենք արձանագրել»,- ասել է ԱԶԿ-ի մայրաքաղաքի մասնաճյուղի ղեկավարը:
