Անգլիայի Պրեմիեր լիգայի 32-րդ տուրում Լոնդոնի «Արսենալը», սեփական հարկի տակ 2:0 հաշվով առավելության հասնելով «Նյուքասլի» նկատմամբ, հանգրվանեց մրցաշարային աղյուսակի 3-րդ հորիզոնականում՝ շրջանցելով սկզբունքային մրցակից «Տոտենհեմին»: Վերջինս այս տուրում դրամատիկ պայքարում 2:1 հաշվով զիջել էր «Լիվերպուլին»: Այս պահին «Արսենալն» ունի 63, իսկ 4-րդ հորիզոնականում գտնվող «Տոտենհեմը»՝ 61 միավոր: Նույնքան միավոր է վաստակել նաև լավագույն հնգյակը եզրափակող «Մանչեսթեր Յունայթեդը», իսկ լոնդոնյան մեկ այլ ակումբ՝ «Չելսին», 60 միավորով 6-րդն է: Պրեմիեր լիգայի 2018/19թթ. մրցաշրջանի ավարտից 6 տուր առաջ թեժ պայքար է ծավալվել 3-4-րդ հորիզոնականների համար:
Նշենք, որ Անգլիայի առաջնությունում լավագույն քառյակում հայտնված թիմերն իրավունք են ստանում Չեմպիոնների լիգայի խաղարկության խմբային փուլին մասնակցելու: Հիշեցնենք, որ «Արսենալը» պայքարը շարունակում է նաև Եվրոպա լիգայի խաղարկությունում: Քառորդ եզրափակչում անգլիական ակումբը մրցելու է Իտալիայի փոխչեմպիոն «Նապոլիի» հետ:
Այն, որ մրցաշրջանի ավարտին «Արսենալը» վերելք է ապրում, կարծում ենք՝ փաստ է: Պրեմիեր լիգայի տնային վերջին 10 հանդիպումներում «Արսենալը» նույնքան հաղթանակ է տարել: Վերջին անգամ լոնդոնյան թիմը նման ցուցանիշ գրանցել էր 1998 թվականին: Ընթացիկ մրցաշրջանում «Արսենալը» վերջին անգամ տանը՝ «Էմեիրեյթս» մարզադաշտում, միավորներ է կորցրել 2018 թվականի նոյեմբերի 11-ին՝ ոչ-ոքի՝ 1:1 խաղալով «Վուլվերհեմփթոնի» հետ: Ավելին, վերջին երեք հանդիպումներում «Արսենալն» ընդհանրապես գնդակ չի ընդունել: Մասնավորապես, երեկվա հանդիպումից առաջ «Արսենալը» Եվրոպա լիգայի խաղարկության 1/8-րդ եզրափակչի պատասխան խաղում 3:0 հաշվով առավելության էր հասել ֆրանսիական «Ռենի» նկատմամբ, այնուհետև 2:0 հաշվով հաղթել «Մանչեսթեր Յունայթեդին»: Երեք խաղում անընդմեջ «Արսենալը» գոլ բաց չէր թողել 1.5 տարի առաջ: Այն ժամանակ «Արսենալը» ոչ-ոքի՝ 0:0 էր խաղացել «Վեսթ Հեմի» հետ, այնուհետև 1:0 հաշվով առավելության հասել «Նույքասլի» և նույն «Վեսթ Հեմի» նկատմամբ, սակայն Անգլիայի գավաթի խաղարկությունում:
Ինչևէ, երեկվա խաղում «Արսենալը» ցուցադրեց բալանսավորված խաղ և մրցակցին գերազանցեց բոլոր առումներով: Լոնդոնյան թիմի գլխավոր մարզիչ Ունայ Էմերին նախընտրել էր ընդգծված հարձակողական 3-4-2-1 մարտավարությունը՝ տոն տալով եզրերին դաշտի կենտրոնական հատվածին: Որպես վինգերներ՝ Էմերին օգտագործեց Կոլաշինացին և Մայթլենդ Նայլսին: Միևնույն ժամանակ Էմերին հագեցրել էր կիսապաշտպանության կենտրոնը՝ ի դեմս Իվոբիի, Օզիլի, Ռեմսիի և Գենդուզիի: Միակ հարձակվողն Ալեքսանդր Լակազետն էր, որ խփեց իր թիմի երկրորդ գնդակը: Չնայած Էմերին այս հանդիպումից առաջ որոշակի խնդիրներ ուներ, այնուամենայնիվ կարողացավ մարտավարական ճիշտ լուծում գտնելով դրական արդյունքի հասնել:
Այսօր շատերի մեջ հարց է ծագում՝ ինչո՞ւ Հայաստանի հավաքականի ավագը երեկ մեկնարկային կազմում չէր: Մեր ֆուտբոլիստը խաղադաշտ դուրս եկավ միայն հանդիպման 83-րդ րոպեին՝ փոխարինելով Օզիլին: Պատասխանը ավելի քան պարզ է. Մխիթարյանը «Նյուքասլի» հետ հանդիպումից առաջ 2020 թվականի Եվրոպայի առաջնության ընտրական փուլի շրջանակներում երկու ծանր հանդիպում էր անցկացրել Հայաստանի ազգային հավաքականի կազմում՝ առանց փոխարինման խաղալով Բոսնիա-Հերցեգովինայի և Ֆինլանդիայի դեմ: Մոտ 10 օր թիմից կտրված լինելով և հոգնածության գործոնը ուղղակի չէին կարող բացասական ազդեցություն չունենալ: Այս հանգամանքները հաշվի առնելով՝ Էմերին Մխիթարյանին ընդգրկել էր պահեստայինների շարքում: Վստահ ենք, որ եթե «Արսենալի» խաղը ցանկալի ընթացք չունենար, ապա իսպանացի մասնագետը Մխիթարյանին ավելի շուտ խաղադաշտ դուրս կբերեր արդյունքի հասնելու նպատակով:
«Արսենալի» հիմնական կազմում չէր նաև Պյեր-Էմերիկ Օբամեյանգը, որը ևս խաղավարտին մոտ ասպարեզ դուրս եկավ: Գաբոնցի հարձակվողը, ինչպես Մխիթարյանը, միացել էր իր ազգային հավաքականին և մասնակցել Բուրունդիի հետ հանդիպմանը: Այստեղ մեկ այլ հարց է ծագում՝ իսկ ինչո՞ւ էր հիմնական կազմում բոսնիացի Կոլաշինացը, որը ևս միացել էր իր ազգային թիմում: Պաշտպանության ձախ գոտում Էմերին ուղղակի այլընտրանք չուներ: Մեկ այլ եզրային պաշտպան՝ Ստեֆան Լիխշտայները, որը հրավիրվել էր Շվեյցարիայի ազգային հավաքական, ընդհանրպաես տեղ չէր գտել «Նյուքասլի» դեմ հանդիպման հայտացուցակում:
Կարծում ենք՝ առաջիկա հանդիպումներում Հայաստանի հավաքականի ավագը ավելի շատ խաղաժամանակ կստանա: Իսկ հաջորդ հանդիպումն «Արսենալն» անցկացնելու է ապրիլի 7-ին՝ Պրեմիեր լիգայի 33-րդ տուրում հյուրընկալվելով «Էվերթոնին»: Հաղթելու դեպքում Էմերիի թիմը ևս մեկ կարևոր քայլ կկատարի 3-րդ հորիզոնականի համար պայքարում: Ապրիլի 11-ին էլ արդեն Եվրոպա լիգայի խաղարկության քառորդ եզրափակչում «Արսենալը» «Էմեիրեյթս» մարզադաշտում առաջին հանդիպումը կանցկացնի «Նապոլիի» հետ:
