Ա․ Սպենդիարյանի անվան օպերայի և բալետի ազգային ակադեմիական թատրոնի անձնակազմն իր վրդովմունքն է հայտնում և արդեն մի քանի օր է բողոքի ակցիա է իրականացնում ՀՀ մշակույթի նախարարի պաշտոնակատար Նազենի Ղարիբյանի որոշման դեմ, որով տնօրենի պաշտոնից ազատվել է Կոնստանտին Օրբելյանը։
«Արդեն երկու տասնյակ տարի է բազմիցս ասել ենք, որ պետական, ոչ առևտրային կազմակերպությունների մասին օրենքը հակաստեղծագործական է, հակաթատերական է, բացարձակապես հաշվի չի առնվում թատրոնի բնույթը, այն, որ թատրոնի ղեկավարը պետք է լինի ստեղծագործող անձ, և չի կարելի տարանջատել թատրոնի ստեղծագործական և ֆինանսատնտեսական գործունեությունը, այդ հարցերը, ինչպես ընդունված է աշխարհում, լուծում է մեկ մարդ՝ մեկ լիդեր, նա է որոշում թատրոնի գեղագիտությունը և քաղաքականությունը: Եղել են դեպքեր, երբ տնօրեն են նշանակվել ոլորտից անտեղյակներ, և նրանք արագ կործանել են այդ ասպարեզը»,- «Առաջին լրատվական»-ի հետ զրույցում նշեց Տիկնիկային թատրոնի տնօրեն Ռուբեն Բաբայանը՝ ի հակադրություն այն պնդման, որ Կ. Օրբելյանը զբաղեցրել է երկու պաշտոն՝ տնօրենի և գեղարվեստական ղեկավարի, ինչը օրենքի խախտում է համարվում: Ռ. Բաբայանի դիտարկմամբ՝ այդ օրենքը բազմաթիվ ականներ է պարունակում:
Նրա խոսքով՝ օրենքը նախկինում արտագրվել է ՌԴ օրենքից, սակայն մի քանի տարի առաջ՝ Ռուսաստանում հասկանալով անհեթեթությունը, այն փոխվել է:
«ՊՈԱԿ-ների մասին այս օրենքի պատճառով տուժում է արվեստը, եկեք հեղափոխությունն օգտագործենք հօգուտ արվեստի, Նազենի Ղարիբյանի գնալով՝ այս հարցը չի լուծվի, կոչ եմ անում փոխել հենց օրենքը»,- ընդգծեց Օպերայի դերասանական օժանդակ կազմի ղեկավար և հրապարակախոս Արփի Մաղաքյանը:
Մանրամասն՝ տեսանյութում: