Արցախի Մարդու իրավունքների պաշտպան Արտակ Բեգլարյանը «Առաջին լրատվական»-ի հետ զրույցում անդրադարձել է 2016 թվականի Ապրիլյան քառօրյա պատերազմի պատճառներին։
Բեգլարյանի խոսքերով՝ կան սուբյեկտիվ և օբյեկտիվ բազմաթիվ պատճառներ թե՛ ներսում և թե՛ արտաքին ճակատում. «Դրանք աշխարհաքաղաքական հանգամանքներն են, ռազմաքաղաքական պայմանները, Ադրբեջանի ներքին իրավիճակը, Ադրբեջան-կոնկրետ պետություններ հարաբերությունները, Հայաստան-կոնկրետ պետություններ հարաբերությունները»։
Մեր զրուցակիցը նշեց՝ անհնար է, որ որևէ կողմ պատերազմում բացթողումներ չունենար. «Բայց նման պատերազմները կամ «առիթները» նաև հնարավորություն են տալիս հասկանալու այդ բացթողումները, որպեսզի կանխենք ավելի լայնամասշտաբ խնդիրների հետ հետագա առերեսումը, ավելի բաց տեքստով ասած՝ կանխարգելենք ավելի լայնամասշտաբ պատերազմը»։
Արտակ Բեգլարյանը կասկածում է, որ Ադրբեջանը լուրջ հետևություններ կանի միջազգային կառույցների որոշումներից. «Բայց մեր պետությունը, մարդու իրավունքներին աջակցող միջազգային կառույցները պետք է լրացուցիչ միջոցներ ձեռք առնեն, որ Ադրբեջանը վերացնի կամ առնվազն մեղմացնի իր հայատյաց քաղաքականությունը»։
Արցախի ՄԻՊ-ը կարծում է, որ Արցախի հասարակությունը որոշ չափով փոխվել է 2016 թվականի պատերազմից հետո. «Հասարակության մեջ իր դինամիկ տեղն ունի երիտասարդությունը, որն 90-ականների պատերազմը չի հիշում, մեզ համար սա ռեալ փորձառություն էր՝ զգալու պատերազմի «հոտը»։ Այո՛, հասարակությունը հետևություններ է արել, և հասարակության մտածողության մեջ կան փոփոխություններ։ Չպետք է թերագնահատել պատերազմի ռիսկը, չպետք է թերագնահատել հակառակորդի հնարավորություններն ու նպատակները»։
Հարցազրույցն ամբողջությամբ՝ տեսանյութում։
