«Կազանի հանդիպումից հետո «Կոմերսանտ» թերթում եղավ տեղեկատվություն, որ Մեդվեդևը հիասթափված է և հնարավոր է հրաժարվի ակտիվ միջնորդի դերից: Շատ հնարավոր է, որ Մեդվեդևի այս ուղերձը կապված է հենց այդ ինֆորմացիայի հետ և Մեդվեդևը դրանով փորձել է հասկացնել, որ այստեղ նաև իր իմիջի խնդիրն է»,- «Առաջին լրատվականի» հետ զրույցում խոսելով ՌԴ նախագահ Դ.Մեդվեդևի Սերժ Սարգսյանին և Իլհամ Ալիևին հղած ուղերձի մասին, կարծիք հայտնեց ռազմավարական և ազգային հետազոտությունների հայկական կենտրոնի փորձագետ Էդգար Վարդանյանը:
Նա նաև հետաքրքիր համարեց այն հանգամանքը, որ մինչ Կազանի հանդիպումն էլ բոլոր ակնկալիքները, գնահատականները և հետաքրքիր տեղեկատվությունները հրապարակվում էին հենց «Կոմերսանտ» թերթում:
Վարդանյանը նաև նշեց, որ այս պահին դժվար թե լուրջ զարգացումներ տեղի ունենան, քանզի խնդրի կարգավորման հայեցակարգն է պետք ամբողջությամբ փոխել, որը պետք է լինի փոխհամաձայնեցված. «Եթե հիմա Ռուսաստանն այլ բան է ներկայացնելու, Եվրամիությունը` այլ, ապա այս դեպքում դժվար թե կարելի է սպասել առաջընթացի, միջնորդների մեջ կոնսենսուս պետք է լինի»:
ՌԱՀՀԿ փորձագետի դիտարկմամբ` Մեդվեդևը հասկանում է, որ Եվրամիությունը ակտիվանում է ԼՂ հարցի կարգավորման բանակցային գործընթացում և իր դուրս գալը չի բխում Ռուսաստանի շահերից, քանզի դա կնշանակի կարգավորումն ամբողջությամբ հանձնել Արևմուտքին. «Մեդվեդևն ուղղակի պետք է փորձի իր մոտեցումները համաձայնեցնել Արևմուտքի հետ, առանձին առաջարկներ ներկայացնելն անհույս բան է և որևէ կերպ հաջողություն չի ունենա: Մեդվեդևը փորձել է ցույց տալ, որ ինքը չի հեռանում և ամեն ինչ անելու է մնալու հիմնական միջնորդներից մեկը»: