«Չեմ կարծում, որ նոր առաջարկների մեջ կներառվեն Կազանում Ադրբեջանի կողմից առաջարկված 10 փոփոխությունները, ընդհակառակը՝ միջազգային հանրության համար կարևոր է ցույց տալ, որ դեռևս սպառված չեն բանակցություններով հարցը խաղաղ կարգավորելու հնարավորությունը և կարծում եմ, նման հայտարարությունները ավելի շուտ դիվանագիտական նպատակ ունեն»,- «Առաջին լրատվականի» հետ զրույցում անդրադառնալով Ֆրանսիայի արտգործնախարարի հայտարարությանը, թե հնարավոր է առաջիկայում կողմերին լրացուցիչ առաջարկիներ արվեն, կարծիք հայտնեց քաղաքագետ Հրանտ Մելիք-Շահնազարյանը:
Քաղաքագետը համեմատելով Ֆրանսիայի արտգործնախարարի հայտարարությունը ՄԽ-ի ֆրանսիացի համախագահի Եվրախորհրդարանում արած այն հայտարարություն հետ, թե եթե Կազանում առաջընթաց չլինի, ՄԽ-ը ստիպված կլինի հրաժարվել Մադրիդյան սկզբունքներից կամ փոխել հայեցակարգ, ընդգծեց, որ միանշանակ երևում է, որ բանակցային գործընթացում փոփոխություններ պետք է մտցվեն:
«Երևի թե այդ փոփոխությունները շատ ավելի գլոբալ կլինեն, քան որոշ կետերի քննարկումը և, միգուցե, հնարավոր է ներկայիս փուլում փոխել բանակցային գործընթացի տրամաբանությունը»,- մանրամասնեց Մելիք-Շահնազարյանը: