NASA-ի տնօրեն Ջեյմս Բրայդենսթայնը հայտարարել է Լուսնի մակերևույթին ԱՄՆ-ի մշտական ներկայություն հաստատելու Միացյալ Նահանգների վարչակազմի մտադրության մասին:
«Ներկայում մեր գլխավոր գերակայություններց մեկը Լուսին վերադառնալն է: Այս անգամ մենք դա կանենեք ոչ այնպես, ինչպես Apollo արշավախմբի ժամանակներում: Այս անգամ դեպի Լուսին թռիչքը կավարտվի մշտական ներկայությամբ»,- ասել է Բրայդենսթայնն ԱՄՆ-ի Կոնգրեսի Ներկայացուցիչների պալատի՝ առևտրի, արդարադատության, գիտության և դրանց հետ կապված հիմնարկությունների հարցերի ենթակոմիտեում մարտի 27-ին կայացած ունկնդրումների ժամանակ: «Դա նշանակում է, որ մենք կմնանք այնտեղ: Դա չի ենթադրում մարդկանց մշտական ներկայություն Լուսնի մակերևույթին: Դա նշանակում է, որ այնտեղ կլինեն մեր ռոբոտները, լուսնագնացները, ինչպես նաև մարդիկ, որոնք կվերադառնան այնտեղ տևական ժամանակով գիտությամբ զբաղվելու համար»,- պարզաբանել է նա: Ավելի վաղ ԱՄՆ-ի փոխնախագահ Մայք Փենսը հայտարարել է, որ երկրի նախագահ Դոնալդ Թրամփը NASA-ին ցուցում է տվել «ցանկացած միջոցներով» մարդկանց Լուսին ուղարկել առաջիկա հինգ տարում: «Նախագահի կարգադրությամբ՝ գործող վարչակազմի և Ամերիկայի Միացյալ Նահանգների նպատակն է ամերիկացի աստղանավորդներին Լուսին վերադարձնել հաջորդ հինգ տարվա ընթացքում»,- ասել է նա ԱՄՆ-ի Ազգային տիեզերական խորհրդի նիստում: Փենսի խոսքով, որը ղեկավարում է Ազգային տիեզերական խորհուրդը և համակարգում է ԱՄՆ-ի տիեզերական քաղաքականությունը, ԱՄՆ-ը կդառնա առաջին տերությունը, որը XXI դարում մարդիկ կուղարկի Լուսին, իսկ «Լուսնի վրա առաջին կինը և հաջորդ տղամարդը կլինեն ամերիկացի աստղանավորդները, որոնք կթռչեն ամերիկյան հրթիռով ամերիկյան հողից», հաղորդել է ՏԱՍՍ գործակալությունը: