Վիեննայում, մարտի 29-ին, ԵԱՀԿ Մինսկի խմբի համանախագահների միջնորդությամբ կկայանա Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի առաջին պաշտոնական հանդիպումը։
Այդ կապակցությամբ ԱՊՀ երկրների ինստիտուտի փոխտնօրեն Վլադիմիր Եվսեևը կարծում է, որ պետք չէ ԼՂ հիմնախնդրի շուրջ բանակցություններում բեկումնային առաջընթաց ակնկալել։ Պատճառն այն է, որ հակամարտությունը կողմերի միջև չի թուլացել: Բացի այդ, տվյալ պահին Բաքուն առավել սադրիչ քաղաքականություն է վարում։
Իսկ Ղարաբաղում լարվածության թուլացումը, ըստ փորձագետի, ժամանակավոր է։ Ադրբեջանը 2016-ի դեպքերը կրկնելու հարմար առիթի է սպասում։
Եվսեևն անիրականանալի է համարում պաշտոնական Ստեփանակերտին բանակցությունների սեղանի շուրջ նստեցնելը։
«Դա կարելի է Ղարաբաղի պաշտպանության պատասխանատվությունը Ստեփանակերտին փոխանցելու ակտ դիտարկել»,-ասել է փորձագետը։
Պետք չէ մոռանալ նաև Նախիջևանում Թուրքիայի ակտիվության, երկաթուղու կառուցման մասին։ Փորձագետը վստահ է՝ լուրջ չէ այս պահին խոսել ԼՂ հիմնախնդրի խաղաղ ճանապարհով կարգավորման մասին։
Նա հավելել է, որ Ադրբեջանը մտադիր է ուժով տիրանալ Ղարաբաղին։ Խոսքը միայն անվտանգության գոտիների մասին չէ, այլ ամբողջ Լեռնային Ղարաբաղի։ Եվսեևը վստահ է․ անգամ մեկ շրջան հանձնելով Հայաստանը կարող է կորցնել ամբողջ Ղարաբաղը։