Սկաֆանդրի կրծքավանդակի հատվածի հետ կապված խնդիրները պատճառ են դարձել կին տիեզերագնացներ Էն Մաքքլեյնի և Քրիստինա Քոխի միաժամանակ բաց տիեզերք դուրս գալու հետաձգման համար, հաղորդում է ՏԱՍՍ-ը, վկայակոչելով NASA-ի տարածած հայտարարությունը:
Գործակալությունը հիշեցրել է, որ Մաքքլեյնի և Քոխի բաց տիեզերք դուրս գալը պետք է կայանար մարտի 29-ին, և ենթադրվում էր, որ նրանք Միջազգային տիեզերակայանում մարտկոցների նոր համակարգ կտեղադրեն: NASA-ն ընդգծել է, որ երկու կին տիեզերագնացները միաժամանակ բաց տիեզերքում կլինեն առաջին անգամ:
Հայտարարության հեղինակները նշել են, որ մարտի 22-ին բաց տիեզերք դուրս գալուց հետո Մաքքլեյնը հասկացել է, որ իրեն կրծքավանդակի հատվածում միջին չափ ունեցող սկաֆանդր է անհրաժեշտ: NASA-ն չի կարողանա միանգամից երկու նման սկաֆանդր նախապատրաստել մինչև մարտի 29-ը, ուստի այդ օրը Քոխը տիեզերք կուղևորվի տիեզերագնաց Նիք Հեյթի հետ: