«Առաջին լրատվական»-ի զրուցակիցը Պահպանողական կուսակցության նախագահ Միքայել Հայրապետյանն է։
–Պարոն Հայրապետյան, ՀՀ կառավարությունն առաջարկել է Քաղաքացու օր սահմանել ապրիլի վերջին կիրակի օրը։ Ձեր կարծիքով, որքանո՞վ է արդարացված այժմ նման նախաձեռնությամբ հանդես գալը։
– Քաղաքացու տոնը հրաշալի կլիներ: Հիշում եմ՝ ժամանակին ՀՅԴ-ն էլ նման մի լավ առաջարկ էր արել: Ինքս շատ կուզենայի, որ Օգոստոսի 11-ը՝ Հայկ Նահապետի՝ հանուն Ազատության տարած հաղթանակի օրը, սահմանվեր Ազատության տոն: Գիտեք՝ շատ քիչ ժողովուրդներ կճարվեն մոլորակի վրա, որ իրենց ծագումը բխեցնեն Ազատությունից: Տոնացույցը ցանկացած ազգի հոգեկերտվածքի, մենթալիտետի, ներկա արժեհամակարգի և ապագայի տեսլականի ամենաճշգրիտ ցուցիչն է: Այնպես, որ Կառավարության նման նախաձեռնությունը երբեք չի կարող ո՛չ ուշ և ո՛չ շուտ լինել:
–Այդ առաջարկի ընդդիմախոսները նկատում են, թե դեռ ժամանակը չէ նման տոն սահմանելու։ Արդյո՞ք հարկավոր չէր կապիտալիզացնել հեղափոխության ձեռքբերումները, երկիրը դնել զարգացման հունի մեջ, որից հետո նման տոն կարելի կլիներ առաջարկել։
– Ցանկացած դրական գործընթացի, այդ թվում՝ հեղափոխության, ձեռքբերումները հենց նման բաներով են կապիտալիզացվում, առարկայացվում՝ դադարելով «միֆ, ուղեղային մորմոք ու սրտի հիվանդություն» լինելուց: Քաղաքական, տնտեսական և այլ կարգի հեղափոխությունները սոսկ արձագանքն են Մտքի և Հոգու հեղափոխության, որ հենց նման բաներով է սաղմնավորվում: Հակառակ ծայրից սկսած ազգերը եթե անգամ ժամանակավոր հաջողության են հասել, ապա դա եղել է վաղանցուկ և բուտաֆորիկ:
–Հայաստանի գործող իշխանությունները երբեմն քննադատությունների սուր թիրախի տակ են հայտնվում, որոշ քայլեր էլ տարակուսանք են առաջացնում։ Ըստ Ձեզ, պատճառը միայն մի շարք պաշտոնյաների անփորձությո՞ւնն է, թե՞ պետական համակարգում հնարավոր է սաբոտաժի տարրեր լինեն։
– Պատճառները շատ կարող են լինել. թե՛ չկամությունը, թե՛ սաբոտաժը, թե՛ նորերի որոշ անփորձությունն ու ինքնահավանությունը, սակայն ամենից կարևորը հոգևոր արժեքներ կրել-չկրելն է՝ որքանո՛վ երջանիկ ու հպարտ երկիր կերտելու գործին լծվածները Սեր և Նվիրում ունեն, ինչպես Տերյանն էր ասում:
–Վարչապետ Նիկոլ Փաշինյանն իր ասուլիսում հայտարարել է, թե կառավարության դեմ միլիոնավոր դոլարներ են ծախսում՝ հակաքարոզչություն անելու համար։ Հակահեղափոխական այդ ուժերին կհաջողվի՞ մեծ ռեսուրսներով ջլատել վարչապետի թիմին եւ անվստահություն առաջացնել։
– Նախ՝ հանրային գիտակցման մեջ տարբերակված են ընկալվում Վարչապետն ու իր թիմը. և դա անառարկելի փաստ է: Ապա՝ այս պահի դրությամբ հակակառավարական քարոզչություն իրականացնողները կարող են միայն հուսալ անվերապահ վստահության թույլ սասանում, ոչ ավելին: Ժամանակի ավելի մեծ կտրվածքում, անշուշտ, վերաբերմունքը կփոփոխվի. դա իրերի օբյեկտիվ ընթացք է, որի ընդամենը արագությունների վրա կարող են ազդել այսօրվա չկամները:
–Մամուլում մեծ աղմուկ բարձրացրեց պաշտպանության նախկին փոխնարար Վահան Շիրխանյանի նամակը՝ ուղղված Ռոբերտ Քոչարյանին։ Շիրխանյանը Քոչարյանին մի շարք մեղադրանքներ է հղել, որոնք բավական լուրջ են։ Ձեր կարծիքով, ի՞նչ ազդեցություն կունենան այդ բացահայտումները, արդյո՞ք կան նախադրյալներ նաեւ հոկտեմբերի 27-ի գործը վերաբացելու համար։
– Հոկտեմբերի 27-ի գործը վերաբացելն այլ հարց է, բացահայտելը՝ այլ: Պարոն Շիրխանյանի հայտարարությունների հիման վրա պատկան մարմինները պարտավոր են վերաբացել գործը կամ նրան, առնվազն, հրավիրել հարցաքննության: Բայց վստահ եմ, այդ սոսկալի գործը կարող է բացահայտվել միայն այն ժամանակ, երբ մենք իրապես անկախ երկիր կլինենք:
