Իրանի ԱԳՆ ներկայացուցիչ Բահրամ Քասեմին, ԱՄՆ նախագահ Դոնալդ Թրամփի Գոլանի բարձունքները Իսրայելի մաս ճանաչելու անհրաժեշտության մասին արված հայտարարության ֆոնին զգուշացրել է, որ դա կարող է «նոր բախումների» հանգեցնել, հաղորդում է ՌԻԱ Նովոստին:
Նա ընդգծել է, որ Թեհրանը դատապարտում է Թրամփի Գոլանի բարձունքները Իսրայելի մաս ճանաչելու անհրաժեշտության մասին հայտարարությունը:
«Սիոնիստական ռեժիմը որպես օկուպացիոն ռեժիմ ինքնիշխանություն չունի արաբական և իսլամական տարածքներից որևէ մեկի նկատմամբ: Անհրաժեշտ է արագ դադարեցնել այս ռեժիմի ագրեսիան և օկուպացիոն քաղաքականությունը»,- ասել է Քասեմին:
Իրանի ԱԳՆ-ն հավելել է, որ Թեհրանը ուշադիր հետևելու է բոլոր փոփոխություններին և իր քաղաքական գիծը կհստակեցնի Սիրիայի կառավարության և այլ երկրների հետ խորհրդակցելուց հետո:
Ավելի վաղ, ՌԴ ԱԳՆ-ը Միացյալ Նահանգների կողմից Գոլանը որպես Իսրայելի մաս հնարավոր ճանաչումը ՄԱԿ-ի որոշումների խախտում է անվանել: