Անգլիայի բնակչուհի 19-ամյա Բո Ջեսափը մի ամբողջ կարողություն է վաստակել գաղափարի շնորհիվ, որը մտահղացել է Չինաստան կատարած ուղևորության ժամանակ:
Բոն ընդամենը 16 տարեկան էր, երբ հոր հետ Չինաստան ուղևորվեց: Այնտեղ, նրանց ծանոթները աղջկան խնդրել են իրենց երեխայի համար անուն ընտրել: Բոն գիտեր, որ դա լուրջ հարց է, բայց չէր կարողացել հրաժարվել:
Չինաստանում շատ ընտանիքներ ցանկանում են, որ իրենց երեխաները նաև երկրորդ՝ անգլիական անուն ունենան: Նրանք կարծում են, որ դա կօգնի հետագայում արտերկրում բուհ ընդունվելու և աշխատանք գտնելու ժամանակ: Սակայն ինտերնետի հասանելիության սահմանափակ լինելու պատճառով ծնողները հաճախ չեն կարողանում անգլալեզու կայքերից օգտվել համապատասխան անուն ընտրելու համար, ինչն էլ անհարմար իրավիճակների է հանգեցնում:
«Երբ սովորում էի դպրոցում, շատ չինացի աղջիկներ անգլիական անուններ ունեին, բայց երբեմն շատ տարօրինակ, ինչի պատճառով նրանք ծաղրի առարկա էին դառնում: Այդ պատճառով երեխայի անուն ընտրելը ոչ միայն պատիվ է, այլև մեծ պատասխանատվություն»,- ասել է Բոն:
Ուղևորությունից հետո Բոն որոշել է օգնել այդպիսի ծնողներին: Բոն կայք է ստեղծել, որտեղ հնարավոր է համապատասխան անուն ընտրել՝ ելնելով մի քանի բնութագրող հատկանիշներից: Սկզբում ծնողները նշում են սեռը, ապա հատկանիշները, որոնք կուզեին տեսնել իրենց փոքրիկի մոտ:
Մի քանի տարվա ընթացքում Բոն օգնել է անուն ընտրել 670 հազար փոքրիկի համար, գրում է MamaMia-ն, ինչից բիզնես լեդին ոչ միայն հաճույք է ստացել, այլև ավելի քան 260 հազար ֆունտ ստեռլինգ եկամուտ: