Грузия Online-ի փոխանցմամբ՝ Վրաստանում ԱՄՆ դեսպան Ջոն Բասը լրագրողներին հայտարարել է, որ ժնևյան բանակցությունների ձևաչափը կարևոր դեր է խաղում կայունության պահպանման և հետագա առաջընթացի հասնելու համար։
Այս հայտարարությամբ Բասը մեկնաբանել է Մոսկվայի կողմից բարձրաձայնված այն մտավախությունը, թե ՄԱԿ-ի ԳԱ-ի ընդունած «Աբխազիայից և Հարավային Օսիայից փախստականների ու ներքին տեղահանվածների մասին» բանաձևը սպառնալիքի տակ է դնում ժնևյան ձևաչափը։
Բասը նշել է. «Պատերազմի ավարտից հետո ժնևյան բանակցությունների ձևաչափը մի կողմից մեծ կարևորություն է ներկայացնում գոյություն ունեցող իրավիճակի շրջանակներում կայունության ապահովման համար, իսկ մյուս կողմից էլ՝ հնարավորություններ է ընձեռում, որպեսզի կողմերը կարողանան ընդհանուր լեզու գտնել և առաջընթաց գրանցել։ Մենք կարծում ենք, որ ՄԱԿ-ի բանաձևը պետք է արտացոլի և կողմերին կոչ անի ապահովել հարկադիր վերաբնակների վերադարձը»։
Հիշեցնենք, որ 2008 թվականի հոկտեմբերից սկսած՝ ժնևյան հանդիպումներին մասնակցում են Վրաստանի և Ռուսաստանի (ներառյալ Աբխազիան և Հարավային Օսիան), ԱՄՆ-ի, ՄԱԿ-ի, ԵԱՀԿ-ի ու ԵՄ-ի ներկայացուցիչները։ Դրանցում քննարկվում են Աբխազիայի և Հարավային Օսիայի, փախստականների վերադարձի, անվտանգության երաշխիքների և այլ հարցեր։
Ի դեպ, մինչ այս էլ վրացական կողմն էր սպառնում դուրս գալ ժնևյան բանակցային ձևաչափից՝ գտնելով, որ քանի դեռ Ռուսաստանը շարունակում է Վրաստանում ահաբեկչություններ նախապատրաստել ու կազմակերպել, անիմաստ է նրա հետ բանակցային սեղանի շուրջ նստելը։