Ինչպես գրում է ռուսական Коммерсант-ը, Մոսկվան արդեն կողմնորոշվել է, թե որ թեկնածուին է պաշտպանելու Մերձդնեստրում առաջիկա նախագահական ընտրությունների ժամանակ: Նախապատվությունը տրվելու է Մերձդնեստրի խորհրդարանի ներկայիս ղեկավար Անատոլի Կամինսկուն: Սա անկասկած մեծ հարված է Մերձդնեստրի ներկայիս նախագահ Իգոր Սմիռնովին, որը նույնպես պատրաստվում է մասնակցել ընտրություններին և միշտ համարվել է Մոսկվային հավատարիմ քաղաքական գործիչներից մեկը:
Թեպետ Կամինսկին պաշտոնապես դեռ չի առաջադրվել, սակայն նա անցած շաբաթ այցելել է Մոսկվա, որտեղ կարևոր հանդիպումներ է ունեցել Կրեմլում՝ ՌԴ նախագահի աշխատակազմի ղեկավար Սերգեյ Նարիշկինի հետ, և Պետական Դումայում: Քանի որ Պուտինի անձի նկատմամբ մեծ հետաքրքրություն կա Մերձդնեստրում և նրա աջակցությունը վայելող քաղաքական գործիչը մեծ հնարավորություններ է ստանում հաղթելու ընտրություններում, ապա Մոսկվան համաձայնել է թույլատրել նախընտրական փուլում օգտագործել Կամինսկու և Պուտինի համատեղ նկարը:
