Երեկ Արժույթի միջազգային հիմնադրամի նախկին նախագահ Դոմինիկ Ստրոս Կանին ազատել են տնային կալանքից: Նա հիմա ազատ կարող է տեղաշարժվել ԱՄՆ տարածքով, սակայն նրան արգելել են լքել այն: Փաստաբանների միջնորդությունները պաշտպանել են նաև դատախազները, որոնք արդեն չեն հավատում հյուրանոցի սպասուհու ցուցմունքներին, որի դիմումի համաձայն՝ Ստրոս Կանը ձերբակալվել էր, նրան մեղադրանք էր առաջադրվել սեռական ոտնձգություն կատարելու համար:
Հղում կատարելով The New York Times-ին՝ մենք արդեն տեղեկացրել ենք, որ Ստրոս Կանի ազատ արձակումը շատ հավանական էր դարձել այն բանից հետո, երբ սպասուհին մի շարք խիստ հակասական ցուցմունքներ էր տվել:
Դատարանի որոշումից հետո Ստրոս Կանը դուրս է եկել դահլիճից կնոջ ձեռքը բռնած, ժպտալով, սակայն լրագրողների հետ չի շփվել: Նրան է վերադարձվել նաև գրավի ողջ գումարը, որը կազմում էր մեկ միլիոն դոլար: Հաջորդ դատական նիստը նշանակված է հուլիսի 18-ին: Այդ ժամանակ պարզ կդառնա, թե արդյոք մեղադրանքները վերջնական կհանվեն ԱՄՀ նախկին նախագահի վրայից:
Ամերիկյան և ֆրանսիական մամուլն այս զարգացումներից հետո սկսեց գրել, որ Ստրոս Կանը կրկին մտնում է Ֆրանսիայի նախագահի աթոռի համար պայքարի մեջ: Մինչև ձերբակալությունը նա համարվում էր այդ պաշտոնի ամենալուրջ հավակնորդ: Հիմա որոշ վերլուծաբաններ, ինչպես նաև Ստրոս Կանի սոցիալիստական կուսակցության անդամներն ասում են, որ արդարացվելուց հետո ԱՄՀ նախկին ղեկավարի հնարավորություններն ավելի կմեծանան: