Լոնդոնի «Արսենալը» Եվրոպա լիգայի խաղարկության քառորդ եզրափակչում է: Ֆրանսիական «Ռենից» առաջին խաղում 3:1 հաշվով կրած պարտությունից հետո Ունայ Էմերիի ֆուտբոլիստները «Էմիրեյթս» մարզադաշտում առավելության հասան 3:0 հաշվով:
«Արսենալի» ցուցադրած խաղը կարելի է բաժանել երեք փուլերի: Առաջին փուլում դաշտի տերերը մեծ ճնշում գործադրելով հանդիպման սկզբնամասում՝ երկու գնդակ խփեցին, և թվում էր, թե «Ռենը» ջախջախիչ պարտություն է կրելու: Կրկին Էմերին գործի էր դրել ընդգծված հարձակողական՝ 3-4-1-2 մարտավարությունը: Մասնավորապես, հագեցնելով դաշտի կենտրոնը՝ «Արսենալի» մարզիչը հարձակման կրակագծում ազատ գործելու հնարավորություն էր տվել նոմինալ երկու հարձակվողներին՝ Օբամեյանգին և Լակազետին:
Կիսապաշտպանության կենտրոնում կարելի է առանձնացնել Ռեմսիին, որը սուր գործողություններով ստիպում էր մրցակցի պաշտպաններին իր վրա կենտրոնանալ: Արդյունքում «Ռենի» պաշտպանական եզրերում շարունակ տարածություններ էին առաջանում: Ստեղծված իրավիճակում բավական արդյունավետ գործեցին «Արսենալի» վինգերները՝ Կոլաշինացն ու Մայթլենդ-Նայլսը: Բնական է, որ մեկնարկային բարձր տեմպով «Արսենալը» չէր կարող խաղալ 90 րոպե: Առաջին կեսի միջնամասում և երկրորդ կեսի սկզբնամասում «Ռենին» հաջողվեց կարգավորել խաղը և ստեղծեց դարպասը գրավելու մի քանի իրական հնարավորություն:
«Արսենալի» կազմում որպես թույլ օղակ պետք է նշել Մեսութ Օզիլին, որն այդպես էլ իր տեղը չգտավ խաղային մեխանիզմում: Խաղային երկրորդ փուլը ավելի քան վտանգավոր էր «Արսենալի» համար, և եթե Էմերին չգնար փոփոխությունների, հնարավոր է, որ քառորդ եզրափակչում հայտնվեր ֆրանսիական ակումբը: Օզիլի փոխարեն հանդիպման 69-րդ րոպեին Էմերին խաղադաշտ դուրս բերեց Հենրիխ Մխիթարյանին, որը հաշված րոպեների ընթացքում փոխեց հանդիպման ընթացքը: Նրա առաջին մասնակցությունը գրոհին ավարտվեց վտանգավոր պահով, իսկ երկրորդ մասնակցության շնորհիվ էլ 72-րդ րոպեին Օբամեյանգը հաշիվը դարձրեց 3:0:
Փաստորեն, խաղադաշտ դուրս գալով՝ Մխիթարյանը սկիզբ դրեց «Արսենալի» խաղային երրորդ փուլին, որը կարելի է անվանել հաղթանակի ամրագրման գործընթաց: Առանձնացնենք նաև Էմերիին, որը ճիշտ ժամանակին կատարեց փոփոխությունը: Հայ ֆուտբոլիստը կրկին ապացուցեց, որ «Արսենալի» առանցքային ֆուտբոլիստներից է և խաղադաշտում եղանակ է ստեղծում:
Նշենք, որ Մխիթարյանի մասնակցությունն այս հանդիպմանը հարցականի տակ էր: Մեջքի վնասվածքի պատճառով Հայաստանի ազգային հավաքականի ավագը բաց էր թողել Պրեմիեր լիգայի 30-րդ տուրի «Մանչեսթեր Յունայթեդի» հետ հանդիպումը: Վնասվածքն էր պատճառը, որ «Ռենի» դեմ Էմերին հայ կիսապաշտպանին չէր ընդգրկել «Արսենալի» մեկնարկային կազմում:
«Հիանալի երեկո էր: Մենք հաղթեցինք խոշոր հաշվով և շարունակում ենք պայքարել Եվրոպա լիգայի խաղարկության գավաթի համար: Շնորհակալություն եմ հայտնում մեր ֆուտբոլիստներին և երկրպագուներին: Կարող էինք նաև 4-րդ գնդակը խփել և հանդիպման վերջնամասում ավելի հանգիստ գործել: Մենք մրցունակ էինք հանդիպման 90 րոպեների ընթացքում: Այնուամենայնիվ, կային նաև թերություններ: Մենք կարող էինք ավելի շատ վերահսկել գնդակը և թույլ չտալ մրցակցին գոլային պահեր ստեղծել: Այո, կարող ենք ավելի լավ խաղալ և պետք է աշխատենք այդ ուղղությամբ: Պետք է ողջ ներուժը ներդնենք մեր նպատակին հասնելու համար: Բոլորը սպասում են, որ գալիք մրցաշրջանում «Արսենալին» կտեսնեն Չեմպիոնների լիգայում: Գաղտնիք չէ, որ Չեմպիոնների լիգան կարևոր մրցաշար է, բայց խաղալով Եվրոպա լիգայում՝ ևս աճում ես ու հնարավորություն ստանում խաղալու Չեմպիոնների լիգայում: Անգլիայի Պրեմիեր լիգայում 6 թիմ պայքարում է լավագույն քառյակում տեղ զբաղեցնելու համար: 5-րդ և 6-րդ հորիզոնականներ զբաղեցրած թիմերը չեն հայտնվում ՉԼ-ում, բայց լավ հնարավորություն են ստանում այնտեղ հայտնվելու այլ ճանապարհով»,- նշել է Էմերին:
Հիշեցնենք, որ Պրեմիեր լիգայում «Արսենալը» այս պահին 4-րդն է և իրական հնարավորություն ունի նաև այս մրցաշարի միջոցով հայտնվելու Չեմպիոնների լիգայի խաղարկությունում:
Ինչևէ, «Արսենալ»-«Ռեն» հանդիպման լավագույն ֆուտբոլիստ է ճանաչվել Օբամեյանգը, որն արժանացել է 8.5 գնահատականի: Կապված 2020 թվականի Եվրոպայի առաջնության ընտրական փուլի խաղային օրերի հետ՝ Պրեմիեր լիգայում դադար է հայտարարվել: Հաջորդ հանդիպումը «Արսենալն» անցկացնելու է ապրիլի 1-ին՝ «Էմիրեյթս» մարզադաշտում մրցելով «Նյուքասլի» հետ:
«Ռենի» հետ հանդիպումից հետո Մխիթարյանը միանալու է Հայաստանի ազգային հավաքականին, որին ևս սպասում է պայքար ընտրական մրցաշարում: Մարտի 23-ին մեր ազգային թիմը կհյուրընկալվի Բոսնիա և Հերցեգովինային, իսկ մարտի 26-ին Վազգեն Սարգսյանի անվան «Հանրապետական» մարզադաշտում կմրցի Ֆինլանդիայի ընտրանու հետ: Առաջիկա հանդիպումներում, կարծում ենք, ավելորդ է խոսել Մխիթարյանի դերի մասին: Հուսանք, որ մեր հավաքականի ավագը կարևոր այս մրցավեճերին լիարժեք պատրաստ կլինի: