Mercer միջազգային խորհրդատվական ընկերությունը կազմել է կյանքի որակի առումով 2019թ. լավագույն քաղաքների վարկանշային աղյուսակը։
Ցանկը կազմելու համար հիմք են հանդիսացել բազմաթիվ գործոններ, այդ թվում՝ քաղաքների տրանսպորտային ենթակառուցվածքը, բժշկության, կրթության ոլորտները, տվյալ քաղաքի տնտեսական, քաղաքական և սոցիալ-մշակութային միջավայրը:
Հաշվի են առնվել նաև քաղաքների բնակիչների անձնական անվտանգությունը, հանցագործությունների մակարդակը, լրատվամիջոցների ազատությունը, անձնական ազատությունների սահմանափակումները և իրավապահ մարմինների աշխատանքը:
Աղյուսակում ընդգրկված է 231 քաղաք։ Արդեն 10-րդ տարին անընդմեջ ցանկը գլխավորում է Ավստրիայի մայրաքաղաք Վիեննան: Եկրորդ հորիզոնականում Շվեյցարիայի Ցյուրիխ քաղաքն է, երրորդում՝ Կանադայի Վանկուվեր քաղաքը։
Երևանն աղյուսակում զբաղեցնում է 170-րդ հորիզոնականը: Հարևան երկրների քաղաքներից վարկանիշային աղյուսակում Բաքուն զբաղեցրել է 195-րդ հորիզոնականը, Ստամբուլը՝ 130-րդ, Թեհրանը՝ 199-րդ, իսկ Թբիլիսին՝ 187-րդ։ Աղյուսակի վերջին հորիզոնականում Իրաքի մայրաքաղաք Բաղդադն է:
Անձնական անվտանգության առումով լավագույն քաղաքը, ըստ Mercer-ի, Լյուքսեմբուրգն է, որին հետևում են Ֆինլանդիայի մայրաքաղաք Հելսինկին և շվեյցարական Բազել քաղաքը: