«Տնտեսական հեղափոխությունը գործընթաց է, որը առաջին հերթին պետք է սկսի գործարարների մտածողության, աշխարհայացքի, վարքագծի փոփոխությունից։ Եթե այսօր մենք ունենք հավասար մրցակցային դաշտ, ունենք մենաշնորհային կարգավիճակների թուլացում, օրինականության բարձրացում, ապա սա այն է, ինչին միշտ ձգտել են գործարարները։ Մնում է մրցակցել»,- «Առաջին լրատվական»-ի հետ զրույցում ասաց Հայաստանի արդյունաբերողների և գործարարների միության նախագահ Արսեն Ղազարյանը։
Նրա խոսքերով՝ շատ կարևոր է, որ ներդրողները հավատան, որ Հայաստանում իրենց յուրաքանչուր 1 դրամը շահույթ կբերի։
«Մենք ունենք հռչակված խաղի կանոններ, հիմքերը հստակ են, կոռուպցիայի աստիճանը կտրուկ նվազել է, համակարգային կոռուպցիա չկա, մենաշնորհներ չկան, գերիշխող դիրք ունեցողների դիրքերը նվազում են։ Ամենակարևորը՝ ունենք հավասար մրցակցային դաշտ»,- ընդգծեց Ղազարյանը։
Անդրադառնալով կառավարության կողմից ներկայացված Հարկային նոր օրենսգրքին, Ղազարյանը նշեց, որ դրա վերաբերյալ իրենք ունեն դիտողություններ, որը առաջիկա օրերին կներկայացնեն վարչապետին հատուկ քննարկման ժամանակ։ «Մենք մեր հստակ կարծիքը տվել ենք, որ այս էտապում բյուջեն այդ հարկատեսակով լցնելու քայլերը նպատակահարմար չեն։ Մենք վտանգ ենք տեսնում, որ դրա արդյունքում արտադրական ծավալների նվազում կլինի, և դրա հետևանքով բյուջեն ավելի կտուժի, քան այդ 30 տոկոսանոց հարկի կիրառումից»,- ընդգծեց Ղազարյանը։
Արսեն Ղազարյանը նշեց, որ այս տարվա վերջին նոր միայն կնկատվի խոշոր ներդրումային ակտիվություն։
Առավել մանրամասն՝ տեսանյութում։