«Քանի որ ուրիշ պաշտպանող չկա, մշակույթն ստիպված է ինքնապաշտպանվել»,-«Առաջին լրատվական»- ի հետ զրույցում այս մասին ասաց արվեստի վաստակավոր գործիչ, ռեժիսոր Վիգեն Ստեփանյանը:
«Վտանգավոր սևագիր ասված թուղթը սև թուղթ է դարձել մեր գլխին,- անդրադառնալով Մշակույթի նախարարության ենթակայության ներքո գտնվող ՊՈԱԿ-ների օպտիմալացման վերաբերյալ աղմկահարույց «աշխատանքային փաստաթղթին»՝ նշեց ռեժիսորը՝ ընդգծելով, որ նման գործունեությունը երբեք չի հանգի անհրաժեշտ կարևոր լուծումների: «Ես կողմ եմ թատրոններում ռեֆորմներ անելուն և թատրոններն էլ ավելի առաջ տանելուն, բայց ոչ թատրոնների փակվելուն: Անհրաժեշտ է նախ ունենալ թատրոնների մասին օրենք, որը կլինի բարեփոխումների հիմնաքարը: Դժվար թե որևէ նախարար ռեժիսորից ավելի լավ իմանա՝ ինչպես բեմադրել, կամ դերասանից լավ իմանա՝ ինչպես խաղալ: Թատրոններն իրենք կգտնեն ճանապարհը էլ ավելի լավ ապրելու համար»,- ընդգծեց Վ. Ստեփանյանը:
«Թատրոնների աղքատավարձով գոյատևելն ուղղակի ծիծաղելի է, ու զարմանալի է, որ դեռ այս պայմաններում շարունակում են աշխատել: Պետք է աշխատավարձը բարձրացնել: Չպետք է խոչընդոտել թատրոնի ֆինանսական գործունեությունը: Չաշխատող դերասանների, արվեստագետների բանակ ունենք, որոնք հնարավորություն չունեն աշխատելու, փակելու փոխարեն բացել է պետք, մարդկանց աշխատելու հնարավորություն տալ է պետք»,- նշեց մեր զրուցակիցը: Նրա դիտարկմամբ՝ թատրոնը նաև դաստիարակում է. «Ցավոք մեր հասարակությանը տարիներ շարունակ դաստիարակել են ցածրորակ մշակույթով՝ սերիալ է, թե հնդկական վիպակ, չգիտեմ, խոսքս դրանց մասին է: Պետք է դուրս գալ, գնալ թատրոն: Նախկինում ընտանյոք հանդերձ թատրոն գնալն արարողություն էր, իրադարձություն…»:
Մանրամասն՝ տեսանյութում: