Ադրբեջանի նախագահ Իլհամ Ալիևը ԵԱՀԿ գործող նախագահ, Սլովակիայի արտաքին գործերի նախարար Միրոսլավ Լայչակի հետ Բաքվում կայացած հանդիպմանը մեկնաբանել է ԼՂ հակամարտության կարգավորման հարցով բանակցությունների ընթացքը:
«Ադրբեջանն ամենաշահագրգռված կողմն է հայ-ադրբեջանական ղարաբաղյան հակամարտության շուտափույթ խաղաղ կարգավորման հարցում: Հայկական կողմը որևէ լուրջ մտադրություն չունի հիմնարար բանակցություններ վարելու, և Հայաստանը փորձում է խախտել բանակցային գործընթացը»,- ասել է Ալիևը, փոխանցում է «Թրենդ» գործակալությունը:
Ընդգծելով, որ բանակցային գործընթացում որոշակի շարժ է նկատվում՝ նկատի ունենալով երկրների ղեկավարների և ԱԳ նախարարների միջև վերջերս կայացած հանդիպումները, Ալիևը նշել է, որ միջազգային հանրությունը պետք է ճնշում գործադրի Հայաստանի վրա՝ բանակցային գործընթացում առաջընթաց գրանցելու և հայկական զորքերը «Ադրբեջանի շրջափակված տարածքներից» դուրս բերելու համար:
ԵԱՀԿ նախագահն, իր հերթին, հայտարարել է, որ իր այցը Բաքու լավ հնարավորություն է ԼՂ հիմնախնդրին ծանոթանալու համար: Նա ընդգծել է նաև, որ ԵԱՀԿ-ն մեծ ուշադրությամբ հետևում է Հայաստանի ու Ադրբեջանի ղեկավարների ոչ պաշտոնական հանդիպումներին ու պատրաստ է նպաստել կառուցողական զարգացումներին: