«94թ-ից այս կողմ Ադրբեջանի հետ կոնֆլիկտը մտավ ցածր ինտենսիվության փուլ, 2014թ-ից սկսած՝ սահմաններին ունեցանք իրավիճակի սրում: Ադրբեջանը ոչ միայն ռազմական միջոցներով է փորձում ազդել Հայաստանի վրա, այլ նաև կիրառում է տարբեր տեսակի այլ միջոցներ: Մենք հիբրիդային պատերազմի փուլում ենք, և առաջին հերթին թիրախում Հայաստանն է և հայ հասարակությունը: Հիբրիդային պատերազմը միասնական ռազմավարության շրջանակներում՝ տարատեսակ համադրություններով քաղաքական, տնտեսական, տեղեկատվական և ռազմական միջոցների կիրառում է, սրանք հյուծիչ և քայքայիչ միջոցներ են է: Ադրբեջանի ակնկալիքով հիբրիդային պատերազմի քաղաքական կոմպոնենտը միտված է Հայաստանի արտաքին քաղաքականության համար տարատեսակ խնդիրներ ստեղծելու, թուլացնելու հարաբերությունները Ռուսաստանի և տարածաշրջանային գործընկերների հետ, ԱՄՆ-ի և ԵՄ-ի հետ: Եվ դա արվում է լոբբինգային կազմակերպությունների միջոցով՝ մասնավորապես ԱՄՆ-ում, Ռուսաստանի հետ կապերի խորացմամբ, ԵՄ-ի հետ հարաբերություններում «խավիարային» դիվանագիտությամբ»,- «Առաջին լրատվական»- ի հետ զրույցում այս մասին ասաց «Ազգային օրակարգ» կուսակցության համահիմնադիր Արա Գասպարյանը:
Անդրադառնալով հարցին, թե ինչ հակաքայլեր պետք է ձեռնարկվեն քաղաքական և ռազմական ոլորտներում, Ա. Գասպարյանը նշեց. «Շատ հաճախ պետությունները պարտվում են, քանի որ անպատրաստ են լինում պատերազմին այն պարզ պատճառով, որ նախապատերազմական քաղաքական օրակարգերը, պետական քաղաքականության առաջնահերթությունները չեն համապատասխանում անվտանգային միջավայրի նետած մարտահրավերներին: Մենք պետք է հասկանանք, որ գտնվում ենք հիբրիդային պատերազմի փուլում և համապատասխան քաղաքականություն պետք է իրականացնենք և ճիշտ նպատակադրումներ կատարենք: Պետք է ակտիվացնենք աշխատանքները արտաքին քաղաքական դերակատարների հետ… Երկրի ներսում պետք է արմատական վերափոխություններ իրականացնենք…Պետք է կտրուկ խափանել հինգերորդ շարասյան քարոզչությունը»:
Մանրամասն՝ տեսանյութում:
