Անգլիայի Պրեմիեր լիգայի 28-րդ տուրում «Արսենալը» տպավորիչ խաղով՝ 5:1 հաշվով ջախջախեց «Բորնմութին»: Տևական ընդմիջումից հետո Ունայ Էմերիի թիմը ցուցադրեց այն ֆուտբոլը, որին երկար ժամանակ սպասում էին երկրպագուները: Թե՛ առաջին և թե՛ երկրորդ խաղակեսում դաշտի տերերը վերահսկում էին գնդակը:
Երկրորդ խաղում անընդմեջ փայլուն խաղ ցուցադրեց ֆուտբոլի Հայաստանի ազգային հավաքականի կիսապաշտպան Հենրիխ Մխիթարյանը: Հիշեցնենք, որ նախորդ տուրում «Արսենալը» սեփական հարկի տակ 2:0 հաշվով առավելության էր հասել «Սաութհեմփթոնի» նկատմամբ: Այս մրցավեճում Մխիթարյանը դարձել էր գոլի և գոլային փոխանցման հեղինակ: Երեկ արդեն Մխիթարյանը, գոլից բացի, դարձավ նաև երկու գոլային փոխանցման հեղինակ: Վստահաբար կարելի է ասել, որ վերջին երկու հանդիպումներում մեր հավաքականի կիսապաշտպանը լոնդոնյան ակումբի հաղթանակների հիմնական կերտողն էր:
«Հենրիխ Մխիթարյանը՝ մոգության նոր ուսուցիչը»,- այսկեպ է «Արսենալի» պաշտոնական կայքը բնութագրել մեր ֆուտբոլիստի ելույթը երեկվա մրցավեճում: «Բորնմութի» դեմ խաղում երկրպագուներին հատկապես գրավել է Մխիթարյանի համագործակցությունը Մեսութ Օզիլի և Պյեր-Էմերիկ Օբամեյանգի հետ: Բրիտանական մամուլը նշում է, որ հայ-քրդական տանդեմը վերջապես արեց իր գործը:
Խաղից հետո տեղի ունեցած մամուլի ասուլիսի ժամանակ Օզիլի և Մխիթարյանի փայլուն խաղին անդրադարձել է նաև Էմերին. «Կարող եմ միայն մեկ բան ասել. պարզապես հպարտ եմ նրանցով: Հպարտ եմ նաև յուրաքանչյուր ֆուտբոլիստի կատարած աշխատանքով: Կարևորում եմ, որ մեր խաղացողները ինքնավստահություն են ձեռք բերում, ակտիվորեն համագործակցում են միմյանց հետ: Կարծում եմ՝ մենք կարող ենք մրցունակ լինել գնդակով և առանց գնդակի պայքարի ժամանակ: Կարող ենք կազմակերպված գործել, քանի որ մեր թիմում շատ են անհատականությունները, որոնք դառնում են հանդիպման հերոսները: Կարևորը, սակայն, միասնական թիմի գաղափարն է, որում կան անհատականություններ: Նրանց գլխավոր խնդիրը միասնական թիմն ավելի լավը դարձնելն է: Կխաղա՞ն արդյոք Օզիլն ու Մխիթարյանը միասին «Տոտենհեմի» դեմ՝ այս պահին չեմ կարող ասսել: Այժմ պատրաստվում եմ խաղը նորից նայել ու վերլուծել, այնուհետև դիտել «Տոտենհեմի» խաղը, նոր որոշում կայացնել հիմնական կազմի հարցում: Յուրաքանչյուր ֆուտբոլիստ իր գործառույթն ունի: Մեզ համար կարևոր են խաղադաշտ դուրս եկող բոլոր 11 ֆուտբոլիստները, ինչպես նաև պահեստայինները: Մենք բոլոր այդ ֆուտբոլիստների հետ հույսեր ենք կապում»:
Հեղինակավոր Whoscored պարբերականը հրապարակել է Մխիթարյան ֆուտբոլիստի վիճակագրությունն ու գնահատականը «Բորնմութի» դեմ մրցավեճում: Մասնավորապես, հայ կիսապաշտպանը այս մրցավեճում մեկ հարված է կատարել դարպասին, որն ավարտվել է գոլով: Նրա փոխանցումների ճշգրտությունը 89 տոկոս է, ինչը բավական բարձր արդյունք է: Մխիթարյանը խաղի ընթացքում իրացրել է 2 անկյունային հարված: Հայաստանի ազգային հավաքականի ավագն արժանացել է 8.6 գնահատականի: Նշված պարբերականի վարկածով՝ հանդիպման լավագույն ֆուտբոլիստը Մեսութ Օզիլն է, որը 9.2 բալ է ստացել:
Ի դեպ, Մխիթարյանը երեկ իր արդյունավետությամբ նոր ցուցանիշ է գրանցել «Արսենալում»՝ կրկնելով այս թիմի իսպանացի նախկին կիսապաշտպան Սանտի Կասորլայի ռեկորդը: Մասնավորապես, 2015 թվականից Սանտի Կասորլայից հետո Մխիթարյանն «Արսենալի» միակ ֆուտբոլիստն է, որին հաջողվել է գոլի և գոլային փոխանցման հեղինակ դառնալ Պրեմիեր լիգայում երկու խաղում անընդմեջ: Հանդիպման 64-րդ րոպեին Ունայ Էմերին փոխարինեց Մխիթարյանին՝ նրա փոխարեն խաղադաշտ դուրս բերելով հարձակվող Ալեքսանդր Լակազետին:
«Մխիթարյանը տարերքի մեջ էր, և վստահ եմ, որ նա կզարգացներ հաջողությունը: Էմերին նրան հանգստանալու հնարավորություն տվեց՝ ասելով. «Եղբայր, հերիք է, դու դեռ մեզ պետք ես»: Առջևում լոնդոնյան դերբին է, և անհրաժեշտ է, որ Միկին ուժերով լի մոտենա սկզբունքային այս մրցավեճին: Օզիլն ու Մխիթարյանը հիանալի մարզավիճակում են և խաղից խաղ ավելացնում են: Այս զույգը կարող է դառնալ մեր նպատակի իրականացման հաղթաթուղթը»,- «Արսենալի» ֆորումում գրել է երկրպագու @K_Dave-ը:
Այս հաղթանակի շնորհիվ «Արսենալն» այս պահին ունի 56 միավոր և շարունակում է մնալ 4-րդ հորիզոնականում: Երեկ հաղթանակ տարան նաև 4-րդ հորիզոնականի համար պայքարում «Արսենալի» հիմնական մրցակիցներ «Մանչեսթեր Յունայթեդը» և «Չելսին»: Վերջինս սեփական հարկի տակ 2:0 հաշվով հաղթեց «Տոտենհեմին», իսկ «Մանչեսթեր Յունայթեդը» հյուրընկալվելիս 3:1 հաշվով առավելության հասավ «Կրիստալ Փելեսի» նկատմամբ: «Յունայթեդը» ընդամենը մեկ միավոր է զիջում «Արսենալին» և 5-րդ հորիզոնականում է գտնվում: «Չելսին» 53 միավորով 6-րդն է, սակայն մեկ հանդիպում ավելի քիչ է անցկացրել:
Հաջորդ հանդիպումը «Արսենալն» անցկացնելու է մարտի 2-ին՝ «Ուեմբլի» մարզադաշտում մրցելով «Տոտենհեմի» հետ: Վերջինս 28-րդ տուրից հետո 60 միավորով եզրափակում է լավագույն եռյակը:
