Ղազախստանի մի քանի քաղաքներում իրավապահ մարմինները երկրում իշխող «Նուր Օթան» կուսակցության գրասենյակների մոտ հավաքված տասնյակ մարդկանց են բերման ենթարկել: Բողոքի ակցիաների ցրման մանրամասները և բերման ենթարկելու կադրերը հրապարակել է «Ազատտըկ ռադիոն»:
Նշվում է, որ Նազարբաևի հակառակորդների բողոքի ակցիաները ցրվել են Ալմաթիում և Աստանայում: Մայրաքաղաքում ակցիայի մասնակիցները մտել են Անկախության հրապարակ, անկախության Պալատի մոտ, որտեղ ընթանում էր իշխող կուսակցության համագումարը: Հրապարակում ոստիկանները ձերբակալել են մի քանի տասնյակ մարդկանց, ևս մի քանի ցուցարարներ ձերբակալվել են «Նուր Օթանի» գրասենյակի մոտ:
Ցուցարարները պահանջել են երիտասարդների համար աշխատատեղերի ստեղծում, բազմազավակ մայրերի սոցիալական աջակցության մեծացում, բարեփոխումների իրականացում և իշխող կուսակցության առաջնորդի փոփոխություն:
«Նուր Օթանի» հերթական համագումարի անցկացման օրը փողոց դուրս գալու կոչով մարդկանց դիմել է երկրի նախկին էներգետիկայի նախարար, ընդդիմադիր «Ղազախստանի դեմոկրատական ընտրություն» շարժման հիմնադիր, ներկայումս երկրի սահմաններից դուրս բնակվող Մուխթար Աբլյազովը: Ընդդիմադիր գործիչը Ղազախստանում հեռակա կարգով երկու անգամ դատապարտվել է ազատազրկման, վերջին անգամ՝ ցմահ: