Մեղրիի քաղաքապետարանն աստիճանաբար փորձում է մարել 2007թ-ից առաջացած աշխատավարձի պարտքերը։ Այդպես է վստահեցնում քաղաքապետ Սերգեյ Հայրապետյանը։ Քաղաքային բյուջեն հայտնվել էծանր վիճակում, քանի որ ստիպված է մարել անցյալից կուտակված աշխատավարձային ֆոնդի պարտքերը: Այդ պարտքերից է քաղաքի մանկապարտեզի աշխատավարձային ֆոնդը, որի ծախսերը մնացին տեղական բյուջեի «հույսին»։ Նախակրթարանի ծախսերը հոգում էր Մեղրու ոսկու կորզման արտադրամասը՝ տարեկան հատկացնելով 18,5 մլն դրամ։ Արտադրամասի փակվելուց հետո՝ 2008թ հունիսից, հնարավոր չէր աշխատել առանց պարտքերի։ Երկու տարի առաջ աշխատավարձի ընդհանուր պարտքը 18,5 մլն դրամ էր, երկուսուկես միլիոնն էլ գոյացած տույժ-տուգանքներն են։ Ընդհանուր առմամբ, 21 մլն աշխատավարձի պարտքից մինչև օրս մարվել է 9 մլն դրամ, մինչև 2011թ-ի հունվարը աշխատավարձի պարտքը կհասնի 6 մլն դրամի, վստահեցնում է Սերգեյ Հայրապետյանը։ Պարտքը վերջնականապես կմարվի մինչև սեպտեմբեր։ Ամիսներ առաջ՝ Սյունիքի մարզխորհրդի նիստի ժամանակ մարզպետ Սուրիկ Խաչատրյանը, մեղմ ասած, «քլնգել» էր քաղաքապետին՝ նույնիսկ հանձարարելով ստուգել ավելորդ հաստիքները։ Մարզպետարանի հատուկ հանձնաժողովը ստուգումների ավարտից հետո ոչ մի արտառոց խախտում չարձանագրեց։ Ի դեպ, պարտքերի մարումը հնարավոր դարձավ քաղաքապետարանում եւ ենթակա 6 հիմնարկներում հաստիքների կրճատման շնորհիվ։ Աշխատավարձի ֆոնդը կրճատվել է 40 տոկոսով` 7,5 մլն դրամից հասնելով 4,7 մլն-ի։ Ներկայումս քաղաքապետարանում աշխատում է 16 մարդ, որոնց միջին աշխատավարձը չի գերազանցում 31 հազար դրամը: Մեղրիի քաղաքապետի աշխատավարձը եւս կրճատվել է` 200 հազարից դառնալով 110 հազար դրամ:
