Անգլիայի Պրեմիեր լիգայի 27-րդ տուրում Լոնդոնի «Արսենալը» կարևոր 3 միավոր վաստակեց՝ սեփական հարկի տակ 2:0 հաշվով առավելության հասնելով «Սաութհեմփթոնի» նկատմամբ: Ի տարբերություն Եվրոպա լիգայի խաղարկության 1/16-րդ եզրափակչի ԲԱՏԷ-ի հետ վերջին երկու հանդիպումների՝ լոնդոնյան թիմն այս անգամ ցուցադրեց բալանսավորված և ավելի գրագետ խաղ:
Փորձը ցույց է տալիս, որ Էմերիի թիմը շատ ավելի արդյունավետ է գործում, երբ խաղում է 4-2-3-1 դասավորությամբ: Ավելի ստույգ՝ երկու հենակետային կիսապաշտպանների առկայությունը թույլ է տալիս թե՛ հարձակման և թե՛ պաշտպանական օղակի ֆուտբոլիստներին ավելի ազատ գործել:
«Հրաշալի առաջին խաղակես ստացվեց: Մենք չէինք խփի առաջին գոլը, եթե Լենոյի հրաշալի «սեյվ»-ը չլիներ: Մենք պետք է շնորհակալ լինենք մեր դարպասապահին: Երկրորդ կեսում հակառակորդն ավելի շատ ընդգրկվեց խաղի մեջ, և մենք չկարողացանք իրացնել մեր հնարավորությունները»,- «Արսենալի» պաշտոնական կայքի թղթակցի հետ զրույցում ասել է այս հանդիպման գլխավոր հերոսը՝ Հայաստանի ազգային հավաքականի ավագ Հենրիխ Մխիթարյանը: Վերջինիս կարծիքով՝ ֆուտբոլիստների համագործակցությունը ուղղակի հրաշալի է ստացվում: «Մենք պետք է շարունակենք նույն կերպ գործել և կենտրոնանալ հաջորդ խաղի վրա: Շատ դժվար խաղ է լինելու, ու պետք է պատրաստվենք: Մենք դեռևս պայքարի մեջ ենք ու չենք պատրաստվում հանձնվել: Շատ ուրախ ենք, որ Լակազետն այսքան գոլ է խփում: Կանենք ամեն ինչ, որպեսզի նա շարունակի իր արդյունավետության շարքը»,- ասել է հայ կիսապաշտպանը:
Ապաքինվելով ծանր վնասվածքից՝ Մխիթարյանը բավական արագ կարողացավ մտնել խաղային ռիթմի մեջ, ինչի արդյունքում «Արսենալի» խաղը զգալիորեն առաջընթաց է ապրել: Ավելի ստույգ՝ երբ հայ ֆուտբոլիստը խաղադաշտում է, «Արսենալի» գրոհները շատ ավելի արագ ընթացք են ստանում: Նույնը կարելի է ասել նաև պաշտպանողական գործողությունների մասին: Դաշտի միջին հատվածում Մխիթարյանը ակտիվ կերպով շարունակ փորձում է կոտրել մրցակցի գրոհները:
Բրիտանական մամուլն արդեն իսկ գրում է, որ Մխիթարյանը ոչ մի կերպ չի զիջի իր տեղը հիմնական կազմում «Բարսելոնայից» տեղափոխված Դենիս Սուարեսին: Ավելի ստույգ՝ Սուարեսը եզրային կիսապաշտպան է և հիմնական կազմում տեղ ունենալու համար պետք է ավելի հաջող խաղա Ալեքս Իվոբիից և Մխիթարյանից: Սուարեսը հասցրել է մասնակցել մի քանի հանդիպման, սակայն նրա խաղը չի տպավորել: Մխիթարյանը և Իվոբին այսօր «Արսենալի» առջևի գծի հիմնական ֆիգուրներից են:
Վերջին հանդիպումներում Էմերին հնարավորություն է տալիս նաև Մեսութ Օզիլին: Անհրաժեշտ է, որ առաջնության վերջին հատվածում Էմերին ավելի հարուստ գործիքակազմ ունենա թիմի առաջ դրված խնդիրը լուծելու համար:
Football London պարբերականը Հենրիխ Մխիթարյանի խաղը գնահատել է 8 բալով: «Հիանալի հանդիպում անցկացրեց: Այն լավագույններից էր ընթացիկ մրցաշրջանում: Կազմակերպեց առաջին և խփեց երկրորդ գոլը: Ամբողջ ընթացքում բավական ակտիվ էր»,- գրել է պարբերականը:
Հանդիպման լավագույն ֆուտբոլիստ է ճանաչվել Ալեքսանդր Լակազետը, որն արժանացել է ամենաբարձր՝ 8.6 գնահատականի: «Կարծում եմ՝ արժանի էինք հաղթանակի: Այսօր ավելի լավ տեսք ունեինք, և կարծում եմ՝ երկրպագուները գոհ մնացին խաղից: Ստեղծում էինք գոլային պահեր ու լավ էինք խաղում նաև պաշտպանվելիս: Այնուամենայնիվ կային խնդիրներ, որոնց հետ պետք է հաշվի նստել և աշխատել ավելի ուժեղ դառնալու համար: Մասնավորապես, եթե համեմատենք առաջին խաղակեսի հետ, ապա երկրորդ խաղակեսում, ըստ երևույթին, այնքան էլ լավ չխաղացինք: Չնայած դրան, կարծում եմ, արդարացի կլիներ, որպեսզի երրորդ գնդակը ևս խփեինք: Ամենակարևորն այն է, որ երեք միավոր վաստակեցինք և շարունակում ենք պայքարը լավագույն քառյակում տեղ զբաղեցնելու համար: Մենք խաղ առ խաղ առաջ ենք գնում: Գոհ ենք նրանից, թե որտեղ ենք գտնվում, ու շարժվում ենք առաջ»,- նշել է Էմերին:
«Սաութհեմփթոնի» նկատմամբ տարած հաղթանակի շնորհիվ «Արսենալը» 53 միավորով հանգրվանեց 4-րդ հորիզոնականում: Այս տուրում միավորներ կորցրեց 4-րդ հորիզոնականի համար պայքարում «Արսենալի» գլխավոր մրցակիցներից «Մանչեսթեր Յունայթեդը»՝ ոչ-ոքի՝ 0:0 խաղալով «Լիվերպուլի» հետ: Այս պահին «Մանչեսթեր Յունայթեդը» 52 միավորով 5-րդ հորիզոնականում է: Լոնդոնյան մեկ այլ ակումբ՝ «Չելսին», ունի 50 միավոր, սակայն մեկ հանդիպում ավելի քիչ է անցկացրել: Հիշեցնենք, որ երեկ տեղի ունեցած Անգլիայի Լիգայի գավաթի եզրափակչում «Չելսին» հետխաղյա 11 մետրանոց հարվածաշարում 3:4 հաշվով զիջել էր «Մանչեսթեր Սիթիին»: Պրեմիեր լիգայի մրցաշարային աղյուսակը շարունակում է գլխավորել «Լիվերպուլը», որն ունի 66 միավոր: Երկրորդ հորիզոնականում գտնվող «Մանչեսթեր Սիթին» ունի 65, իսկ լավագույն եռյակը եզրափակող «Տոտենհեմը»՝ 60 միավոր:
28-րդ տուրում՝ փետրվարի 27-ին, «Արսենալը» «Էմիրեյթս» մարզադաշտում կմրցի «Բորնմութի» հետ: Մարտի 2-ին էլ «Ուեմբլի» մարզադաշտում տեղի կունենա «Տոտենհեմ»-«Արսենալ» լոնդոնյան դերբին: