Սյունիքի մարզի Վարդավանք գյուղի մերձակա անտառատարածքում 3 օր առաջ բռնկված հրդեհը այսօր օրվա վերջին մարվեց։ Մոտավոր հաշվարկներով այրվել է մոտ 20 հա անտառածածկ տարածք։ Անցած օրերին այստեղ աշխատել են 50 փրկարարներ ու հրշեջներ։ Գործընկերներին օգնության են հասել նաև ոստիկանները։ Ըստ Սյունիքի փրկարար ծառայության պետ Արթուր Հարությունյանի՝ հրդեհի բռնկման պատճառը մարդկային գործոնն է։ Այս ժամանակաշրջանում վառած լուցկու մեկ հատիկն էլ կարող է վնասել հեկտարներ։ Քամու միջոցով կրակը տարածվում է։ Ամեն դեպքում, վերջնական եզրահանգումը պետք է տան փորձագետները։ Դրանից հետո միայն պարզ կլինի հարուցվո՞ւմ է քրեական գործ, թե՞ ոչ։
Հիշեցնենք, որ հրդեհների բռնկման մասին առաջին ահազանգը ստացվել է նոյեմբերի 17-ին. այն ժամանակ հրդեհաշիջման աշխատանքները տեւել են ավելի քան 5 ժամ: Հաջորդ օրը` նոյեմբերի 18-ի կեսօրից հետո, նոր հրդեհ է բռնկվել նույն անտառահատվածի մեկ այլ տարածքում: Միայն ուշ երեկոյան` ժամը 23-ի սահմաններում, փրկարարական վարչության մոտ 50 աշխատակիցների հաջողվել է մարել այդ հրդեհը եւս: Ընթացիկ տարում Սյունիքում շատ էին անտառային հրդեհները: Մեկ օր առաջ էլ Սիսիանի տարածաշրջանի Բռնակոթ գյուղում էր այրվել 3 հա տարածք։
