Լոնդոնի «Արսենալը» Եվրոպա լիգայի խաղարկության 1/8-րդ եզրափակչում է: Բորիսովում Բելառուսի չեմպիոն ԲԱՏԷ-ին 1:0 հաշվով զիջելուց հետո լոնդոնյան թիմը սեփական հարկի տակ առավելության հասավ 3:0 հաշվով: Ի տարբերություն առաջին հանդիպման՝ «Արսենալը» «Էմիերեյթս» մարզադաշտում ավելի վստահ և սուր խաղ ցուցադրեց: Սպասվածի համաձայն՝ ԲԱՏԷ-ն ապավինել էր պաշտպանությանը՝ հույսը դնելով հակագրոհների վրա: ԲԱՏԷ-ն չուներ այն ռեսուրսը, որը հնարավորություն կտար վերահսկելու գնդակը կամ ճնշում գործադրելու: ԲԱՏԷ-ն պայքարեց այնքան, որքան ներեցին ուժերն ու հնարավորությունները:
Կրկին պետք է արժանին մատուցել ԲԱՏԷ-ի ղեկավարությանը, որը տարիներ շարունակ համեստ միջոցներով ըստ էության ֆանտաստիկ արդյունքներ է գրանցում: ԲԱՏԷ-ն մշտապես աչքի է ընկել գրագետ խաղով: Երեկ էլ 90 րոպեների ընթացքում բելառուսական թիմը հատկապես պաշտպանությունում բավական հաջող խաղաց: «Արսենալի» պես մրցակցի դեմ պաշտպանվելով՝ ԲԱՏԷ-ի ֆուտբոլիստները ընդամենը 12 անգամ խախտեցին կանոնները: Սա խոսում է այն մասին, որ թիմում ձևավորված են խաղային այն մոդելները, որոնք կիրառվում են ըստ անհրաժեշտության:
«Տեղի ունեցածը սեքսից ավելի հաճելի էր»,- «Արսենալի» հետ առաջին խաղից հետո տեղի ունեցած մամուլի ասուլիսի ժամանակ ասել էր ԲԱՏԷ-ի գլխավոր մարզիչ Ալեքսեյ Բագան: Եվ ահա բրիտանական daily Mail պարբերականը, հղում կատարելով «Արսենալի» երկրպագուներին, շարունակել է սեքսի թեման: «Առաջին խաղից հետո Բագան նշել էր, որ «Արսենալին» հաղթելը սեքսից ավելի հաճելի է: Այսօր «Արսենալի» երկրպագուները բավական լավ տրամադրությամբ են արթնացել, քանզի գիշերը mastur-bate (անգլերեն՝ նշանակում է ձեռնաշարժություն) են արել»,- գրել է պարբերականը: «Արսենալի» ֆանատներից baz4-ը, արձագանքելով այս հայտարարությանը, գրել է. «Սա այն բացառիկ գիշերներից է, որ mastur-bate արեցի և ասեմ, որ շատ հաճելի էր: Կարծում եմ՝ բոլորը համոզվեցին, որ Բորիսովում տեղի ունեցածը պատահականություն էր, և իրականում ձեռնաշարժությունը սեքսից ավելի հաճելի է»:
Ինչևէ, «Արսենալի» երեկվա հանդիպումը նշանավորվեց նաև կիսապաշտպանության առաջատար Մեսութ Օզիլի խաղադաշտ վերադառնալով: Չնայած Օզիլը իր բարձրության վրա չէր, այնուամենայնիվ նրա մեջ նկատվում էր ձգտում: Գերմանիայի հավաքականի նախկին ֆուտբոլիստը գործում էր մեծ նվիրումով՝ փորձելով ցույց տալ, որ ուզում է օգտակար լինել «Արսենալին»: Դա հավանաբար նկատել էր նաև «Արսենալի» գլխավոր մարզիչ Ունայ Էմերին, որը նրան 90 րոպե խաղալու հնարավորություն տվեց: Նշենք, սակայն, որ Օզիլը մասնագետների կողմից արժանացել է բավական ցածր գնահատականի: Մասնավորապես, հեղինակավոր Whoscored պարբերականը Օզիլի խաղը գնահատել է 6.9 բալով: Ավելի ցածր գնահատական «Արսենալի» կազմում ստացել է միայն դարպասապահ Պետեր Չեխը՝ 6.8:
Հայաստանի ազգային հավաքականի կիսապաշտպան Հենրիխ Մխիթարյանը ստացել է միջինից բարձր՝ 7.4 բալ: Նշենք, որ մեր ֆուտբոլիստը ակտիվ էր և նպաստում էր, որպեսզի «Արսենալի» խաղային մեխանիզմն ավելի արագ և արդյունավետ գործի: Բրիտանական Football London պարբերականը հայ ֆուտբոլիստի խաղը գնահատել է 7 բալով. «Մխիթարյանը բավական արդյունավետ և տպավորիչ էր գործում աջ եզրում: Շատ գնդակներ էր ստանում և պայքարի մեջ էր: Պակասում էր միայն «մարդասպանի բնազդը» առանցքային դրվագներում»:
«Արսենալ»-ԲԱՏԷ հանդիպման լավագույն ֆուտբոլիստ է ճանաչվել հենակետային կիսապաշտպան Գրանիտ Ջական, որն արժանացել է 8.8 գնահատականի:
Այս անգամ Էմերին պայքարեց 4-2-3-1 դասավորությամբ՝ շեշտը դնելով դիրքային գրոհների վրա: Պաշտպանությունն ավելի բալանսավորված էր գործում շնորհիվ Մուստաֆիի և Լիխշտայների: Վերջինս սպասվածից ավելի հաջող հանդես եկավ: Նախորդ խաղում Էմերին պաշտպանության աջ եզրում օգտագործել էր Մայթլենդ-Նայլսին, որը խիստ անհաջող էր ելույթ ունեցել:
Չնայած «Արսենալը» հաղթեց, պետք է ընդունենք, որ Էմերիի թիմում շարունակում են ցայտուն մնալ խնդիրները: Մրցաշրջանը մոտենում է ավարտին, սակայն «Արսենալում» չկա նկատելի առաջընթաց և կայունություն: Լոնդոնյան ակումբը պայքար է մղում երկու մրցաշարում՝ Պրեմիեր լիգայում և Եվրոպա լիգայում: Երկու հարթություններում էլ Էմերիի թիմի հնարավորությունները այնքան էլ մեծ չեն: Նշենք, որ «Արսենալի» նպատակը գալիք մրցաշրջանում Չեմպիոնների լիգայի խաղարկությունում հանդես գալն է: Դրա համար անհրաժեշտ է Պրեմիեր լիգայում տեղ զբաղեցնել լավագույն քառյակում կամ նվաճել Եվրոպա լիգայի գավաթը:
Երկու օր անց «Արսենալը» Պրեմիեր լիգայի շրջանակներում «Էմիերեյթս» մարզադաշտում մրցելու է «Բորնմութի» հետ: Մարտի 2-ին էլ տեղի կունենա լոնդոնյան դերբին՝ «Արսենալը» «Ուեմբելի» մարզադաշտում կմրցի «Տոտենհեմի» հետ: