Ինչպես հաղորդում է The New York Times-ը, հղում անելով քննությանը մոտ կանգնած աղբյուրներին, Արժույթի միջազգային հիմնադրամի նախկին նախագահ Դոմինիկ Ստրոս Կանի քրեական գործով տուժող սպասուհին հարցաքննությունների ժամանակ բազմիցս ստել է: Թերթը գրում է, որ բազմաթիվ այս բացահայտումները կարող են փլուզել ԱՄՀ նախկին ղեկավարի դեմ հարուցված քրեական գործը:
The New York Times-ի զրուցակիցներից մեկն ասել է, որ դատախազները չեն հավատում Նյու Յորքի Sofitel հյուրանոցի սպասուհու ասածների մեծ մասին: Դատախազությունում նաև հարցեր են առաջացել այն բանի շուրջ, թե ինչպես է Գվենիեայից եկած ներգաղթյալը ապաստան ստացել ԱՄՆ-ում: Բացի այդ, նրան սկսել են կասկածել հանցավոր տարրերի հետ կապեր ունենալու մեջ, մասնավորապես այնպիսի անձնավորությունների, որոնք զբաղվում են փողերի անօրինական լվացմամբ և թմրանյութերի անօրինական շրջանառությամբ:
Թերթը հավելում է, որ գոյություն ունի հեռախոսազրույցի ձայնագրություն, որը կայացել է սպասուհու և ոմն տղամարդու միջև ենթադրյալ հանցագործության օրը: Զրուցակիցներն այդ հեռախոսազրույցի ժամանակ քննարկում են, թե որքան կարելի է աշխատել՝ բարձրաստիճան պաշտոնյայի դեմ մեղադրանք ներկայացնելու դեպքում: Կնոջ հետ զրուցած տղամարդու անձը պարզվել է: Նա բանտարկված է եղել մարիխուանայի մեծ քանակություն պահելու համար:
Նշվում է, որ երեկ դատախազները հանդիպել են Ստրոս Կանի փաստաբանների հետ և քննարկել Ստրոս Կանի դեմ առաջ քաշված մեղադրանքները հանելու հարցը:
