Աֆղանստանում խաղաղարար առաքելության ավարտից հետո Հյուսիսատլանտյան դաշինքը պետք է պատրաստ լինի ռազմական գործողություններ իրականացնել իր սահմաներից դուրս: Այս մասին հաղորդում է «Իտառ-Տասս» գործակալությունը, հղում անելով ՆԱՏՕ-ի գլխավոր քարտուղարի՝ բրիտանական «Daily Telegraph» պարբերականին տված հարցազրույցին: «Մեր հիմնական նպատակն է մեր բնակչության տարածքային պաշտպանությունը, սակայն անհրաժեշտ է գիտակցել, որ ժամանակակից աշխարհում մենք պետք է գործենք նաև դաշինքի սահմաններից դուրս, որպեսզի ավելի արդյունավետ պաշտպանենք կառույցի սահմանները», – ասել է գլխավոր քարտուղար Ռասմուսենը ու հավելել. «Սառը պատերազմի ավարտից հետո ի հայտ են եկել նոր մարտահրավերներ, դրանցից մեկն ահաբեկչությունն է»: Գլխավոր քարտուղարի խոսքերով, Հյուսիսատլանտյան դաշինքի գագաթնաժողովը Լիսաբոնում պետք է ընդունի գործողությունների նոր ռազմավարական հայեցակարգ, որը գործելու է Աֆղանստանից հետո: «Նոր ռազմավարական հայեցակարգի նպատակը դաշինքի նախապատրաստումն է անվտանգության նոր սպառնալիքներին՝ հրթիռային հարվածներին, ահաբեկչական գործողություններին ու հիպերտարածական հարձակումներին», – նշել է Ռասմուսենը:
