Ռուսաստանը, Թուրքիան և Իրանը մերժում են Սիրիայում երկրի ինքնիշխանությունը, անկախությունը և տարածքային ամբողջականությունը խախտող նոր իրողությունների ստեղծման փորձերը: Այս մասին ասվում է երեք երկրների նախագահների՝ Վլադիմիր Պուտինի, Ռեջեփ Թայիփ Էրդողանի և Հասան Ռոհանիի Սոչիում կայացած հանդիպումից հետո արված համատեղ հայտարարության մեջ, հաղորդում է «Ինտերֆաքսը»:
Փաստաթղթում նշվում է, որ առաջնորդները «մերժել են ահաբեկչության դեմ պայքարի պատրվակով երկրում նոր իրողություններ ստեղծելու բոլոր փորձերը»: Պուտինը, Էրդողանը և Ռոհանին իրենց վճռականությունն են հայտնել հակազդելու անջատողական հակասիրիական ծրագրերին, որոնք վտանգում են, այդ թվում, հարևան երկրների անվտանգությունը:
Նախագահները նաև հավելել են, որ ամերիկյան ուժերի դուրսբերումը Սիրիայից կնպաստի կայունության և անվտանգության ամրապնդմանը տարածաշրջանում: