Եվրամիությունը շարունակում է լիովին պաշտպանել Վրաստանի անվտանգությունը, կայունությունը, ինքնիշխանությունը եւ տարածքային ամբողջականությունը, հայտարարել է ԵՄ նախագահ Հերման վան Ռոմպեյը Վրաստանի նախագահ Միխեիլ Սահակաշվիլի հետ կայացած հանդիպման ընթացքում: Այդ մասին այսօր հաղորդել Է Վրաստանի նախագահի վարչակազմի մամլո ծառայությունը: Սահակաշվիլիի եւ Ռոմպեյի հանդիպումը տեղի է ունեցել նոյեմբերի 18-ին Վրաստանի նախագահի՝ Բրյուսել կատարած այցի շրջանակներում:
Ռոմպեյը նշել է այն առաջընթացը, որին Վրաստանը հասել Է Արեւելյան գործընկերության եւ Եվրամիության ասոցիացված անդամակցման համաձայնագրերի առումով: Նա նշել Է, որ Եվրամիությունը կշարունակի օգնությունը (Վրաստանի տարածքում) հակամարտությունների խաղաղ կարգավորման գործում: «Մենք ողջունում ենք Եվրամիության եւ Վրաստանի միջեւ հարաբերությունների բացահայտ առաջընթացը՝ հուլիսին ասոցիացման համաձայնագրի շուրջը բանակացություններն սկսվելուց հետո: Ես ցանկանում եմ նախագահ Սահակաշվիլիին ասել, որ մենք գնահատում ենք Վրաստանի պատրաստակամությունը եւ պրագմատիկ մոտեցումը»,- նշել է նա:
Ռոմպեյի խոսքով, «Եվրամիությունը համաձայնել է այն կառույցների հետագա զարգացման անհրաժեշտությանը, որոնք Վրաստանի օրենսդրությունը կբերեն հիմնական հարցերի գծով Եվրամիության մակարդակին»: «Մենք նաեւ համաձայնեցինք, որ անցագրային ռեժիմի պարզեցման եւ բռնադարձման վերաբերյալ համաձայնագրերը պետք է ուժի մեջ մտնեն մոտ ապագայում: Եվրամիության եւ Վրաստանի միջեւ հարաբերությունների ուժեղացումը Վրաստանի համար կդառնա բարենորոգությունները շարունակելու լրացուցիչ խթան»,- նշել Է նա:
