Անգլիայի Պրեմիեր լիգայի 26-րդ տուրում այսօր Լոնդոնի «Արսենալը» կհյուրընկալվի «Հանդերսիֆիլդին»: Վերջինս 11 միավորով եզրափակում է մրցաշարային աղյուսակը և միայն տեսական հնարավորություններ է պահպանում անգլիական բարձրագույն լիգայում իր տեղը պահպանելու: Ունայ Էմերիի գլխավորած թիմը շարունակում է պայքարը լավագույն քառյակում տեղ ունենալու համար, որը հնարավորություն կտա գալիք մրցաշրջանում հանդես գալու Չեմպիոնների լիգայի խաղարկության խմբային փուլում:
25-րդ տուրում ցույց տալով բավական թույլ ֆուտբոլը «Արսենալը» հյուրընկալվելիս 3:1 հաշվով զիջել էր «Մանչեսթեր Սիթիին» 4-րդ հորիզոնականից նահանջելով 6-րդ հորիզոնական: Լոնդոնյան թիմն այս պահին ունի 47 միավոր: 5-րդ հորիզոնականում գտնվող «Մանչեսթեր Յունայթեդն» ունի 48, իսկ 4-րդ տեղում գտնվող «Չելսին»՝ 50 միավոր: Սպասվում է, որ «Մանչեսթեր Սիթիի» հետ հանդիպման համեմատ Էմերին որոշակի փոփոխությունների կգնա: Մասնավորապես, նախորդ խաղում «Արսենալի» պաշտպանական քառյակը կազմել էին Մոնրեալը, Կոսելնին, Մուստաֆին և Լիխշտայները: Ըստ վերլուծաբանների այսօր պաշտպանության եզրերում կխաղան Բելերնն ու Լիխշտայներն, իսկ կենտրոնում Մուստաֆին և Կոլաշինացը: Կիսապաշտպանությունում էլ հանդես կգան Կոլաշինացը, Տորեյրան, Գենդուզին և Ջական: Նախորդ հանդիպման համեմատ հիմնական կազմում չի լինի Իվոբին, ում կոպիտ սխալի հետևանքով «Մանչեսթեր Սիթին» բացել էր հաշիվը:
Ինչպես նախորդ խաղում, այդպես էլ այսօր «Արսենալի» հարձակվողական բռունցքը կկազմեն Օբամեյանգն ու Լակազետը: Բրիտանական պարբերականների համոզմամբ այսօր «Արսենալի» հայտացուցակում կլինի Հայաստանի ազգային հավաքականի ավագ Հենրիխ Մխիթարյանը, որը վնասվածիքց ապաքինվելուց հետո «Արսենալի» երիտասարդական թիմի կազմում մասնակցել էր «Վեսթ Հեմի» հետ հանդիպմանը: Սպասվում է, որ այսօր Էմերին երկրորդ կեսում Մխիթարյանին հնարավորություն կտա խաղալու: Այսօր «Արսենալը» լուրջ խնդիրներ ունի հատկապես կիսապաշտպանությունում և պաշտպանությունում: Կարելի է փաստել, որ Մխիթարյանի չխաղալու պայմաններում «Արսենալի» գրոհները անհամեմատ ավելի դադնդաղել են և կորցրել սրությունը: «Մանչեսթեր Սիթիի» դեմ խաղում Էմերին 65-րդ րոպեին խաղադաշտ դուրս բերեց «Բարսելոնայից» վերջին պահին տեղափոխված Դենիս Սուարեսին: Եվ ահա բրիտանական մամուլը խիստ քննադատության է ենթարկել Էմերիին նշելով, որ չէր կարելի մեկ երկու օր առաջ թիմի միացած ֆուտբոլիստին վստահել նման պատասխանատու հանդիպմանը: Ըստ կանխատեսումների՝ հնարավոր է, որ Սուարեսն այսօր չլինի «Արսենալի» հայտացուցակում: Բուքմեյքերներն առաջիկ խաղում ֆավորիտ են համարում Էմերիի թիմին: Վերջինիս հաղթանակի համար սահմանված է 1․75 գործակից: Ոչ-ոքին գնահատված է 4․1, իսկ «Հանդերսֆիլիդի» հաղթանակը՝ 5․45 գործակցով:
4-րդ հորիզոնականի համար պայքարում «Արսենալի» հիմնական մրցակիցներից «Մանչեսթեր Յունայթեդն» այսօր մրցելու է մրցաշարային աղյուսակի նախավերջին հորիզոնականում գտնվող «Ֆուլհեմի» հետ և մեծ է հավանականությունը, որ Օլե Գունար Սուլշերի ֆուտբոլիստները հերթական հաղթանակը կտանեն: Ինչ վերաբերվում է «Չելսիին» ապա վերջին 26-րդ տուրի կենտրոնական խաղում վաղը կմրցի «Մանչեսթեր Սիթիի» հետ: Հանդիպումը կայանալու է Մանչեսթերում ուստի բուքմեյքերներն ավելի հավանական են համարում դաշտի տերերի հաղթանակը:
Ինչևէ «Հանդեսֆիլդ»-«Արսենալ» հանդիպումը կսկսվի Երևանի ժամանակով 19-ին: