«Լուսավոր Հայաստան» խմբակցության ղեկավար Էդմոն Մարուքյանը ԱԺ խորհրդի կողմից հաստատված խորհրդարանական պատվիրակությունների կազմի վերաբերյալ «Առաջին լրատվական»-ի հետ զրույցում ասաց. «Մենք առաջարկել էինք, որպեսզի բաշխումը լինի արդարացի և սկզբունքների կիրառմամբ»:
Նրա խոսքով՝ իրենք ներկայացրել էին հետևյալ սկզբունքները. «Չի կարող որևէ պատվիրակություն ներկայացնել երկիրը՝ առանց խորհրդարանի բոլոր խմբակցությունների ներկայացուցիչների ներգրավման, և երկրորդ՝ որ հանրապետական սկզբունքներին պետք է վերջ տրվի, թե՝ մենք շատ ենք, ուրեմն պետք է շատ լինենք, ով շատ է՝ նա է որոշում, ժողովուրդն է որոշել և այլն»:
Մարուքյանը հավելեց, որ քննարկումների արդյունքում չհաջողվեց գալ կոմպրոմիսի. «Որովհետև ինչ-որ պահի ասացին՝ մենք ձեզ զիջում ենք, լավություն ենք անում և մեկ տեղ կտանք, ընդ որում՝ այն տեղը, որը որ մերն էր. այսինքն՝ վերցրել էին, որ նորից ծախեին մեզ վրա: Եվ արդյունքում մենք դեմ եղանք այդ բաշխմանը»:
Մեր զրուցակիցը հետաքրքիր է համարում հատկապես այն, որ պնդվում էր, թե այս ամենը ժողովուրդն է որոշել. «Չգիտեմ՝ միգուցե հարցնե՞նք ժողովրդին, բայց ես կարծում եմ, որ սա սխալ աշխատելաոճ է, ինչը շարունակելու դեպքում մենք չենք կարող առողջացնել քաղաքական համակարգը»:
Ինչ վերաբերում է կառավարության ծրագրին, «Լուսավոր Հայաստան» խմբակցության ղեկավարն ասաց, որ դեռ չի ծանոթացել ծրագրին. «Ես կարդում եմ միայն վերջնական փաստաթղթեր: Ես չունեմ ժամանակ կարդալու փաստաթղթեր, որը պարզվում է՝ սևագիր էր, հետո նորից փոխվում է»:
Առավել մանրամասն՝ տեսանյութում: