Հրապարակվել է կառավարության առաջիկա 5 տարիների զարգացման ծրագրի նախնական տարբերակը, որի շուրջ սկսվել են քննարկումները: Թեմայի շուրջ «Առաջին լրատվական»- ի հետ քննարկմանը մասնակցեցին «Իմ քայլը» խմբակցության պատգամավոր Նիկոլայ Բաղդասարյանը, «Լուսավոր Հայաստան» խմբակցության պատգամավոր Տարոն Սիմոնյանը և ՄԱՀՀԻ-ի փաստաբան Արտաշես Խալաթյանը:
Արդյո՞ք հրապարակված ծրագիրը հեղափոխական կարելի է համարել, որը հնարավորություն կտա տարբեր ոլորտներում հեղափոխություն անել և ֆիքսել արժեհամակարգային փոփոխությունները. անդրադառնալով այս հարցին՝ Ն. Բաղդասարյանը նշեց, որ ծրագրում ներառված դրույթները վերաբերում են հետհեղափոխական ժամանակահատվածին և առաջարկում են լուծումներ: Նա նաև ընդգծեց, որ թեև ծրագրում անցումային արդարադատություն բառակապակցությունը չկա, բայց այնտեղ ներկայացվել են մեխանիզմներ, որոնք անցումային արդարադատության գործիքակազմեր են:
Տարոն Սիմոնյանը ընդգծեց, որ կառավարության ծրագիրն ամբողջությամբ չի արտահայտում հասարակության ակնկալիքները: «Կառավարության ծրագիրը կարևոր քաղաքական փաստաթուղթ է, որը պետք է կողմնորոշիչ լինի առաջիկա տարիների համար: Հետհեղափոխական հասարակությունը կառավարությունից ակնկալում է հեղափոխական տեմպերով զարգացման ծրագիր: Կուզենայի, որ կառավարության ծրագիրն ավելի դետալացված լիներ և համարձակ, ոչ թե լիներ իներցիոն փաստաթուղթ»,- նշեց Տ. Սիմոնյանը:
Արտաշես Խալաթյանի դիտարկմամբ՝ կառավարության ծրագիրը ոչ միայն քաղաքական փաստաթուղթ է, այլ նաև իրավական: Նրա խոսքով՝ բնական է, որ ծրագրում ձևակերպումները չեն կարող լինել այնքան որոշակի, որքան այլ օրենսդրական կամ իրավական ակտերում: «Մեծապես կարևորում եմ ընդդիմության դերը. կառավարության ծրագիրն ընդունվում է քննարկման արդյունքում, նրանց հարցադրումների ու քննադատության շնորհիվ հանրությանը հնարավորություն է ընձեռվում տեսնել ծրագրի դրույթները՝ բացված տեսքով»,- նշեց Ա. Խալաթյանը:
Մանրամասն՝ տեսանյութում: