ԼՂՀ ՊԲ նախկին հրամանատար Սամվել Բաբայանը «Ազատություն» ռադիոկայանի հետ զրույցում հայտարարել է, որ նախատեսում է մասնակցել 2020 թվականին Արցախում կայանալիք նախագահական ընտրություններին: «Ես ոչ թե ցանկություն ունեմ նախագահի թեկնածու առաջադրվելու, այլ ինձ պարտադրում են, որ մասնակցեմ»,- ասել է Բաբայանը և նշել, որ նախատեսում է այս տարվա մարտից ստորագրահավաք սկսել՝ սահմանադրական փոփոխություններ նախաձեռնելու նպատակով: Սամվել Բաբայանի առաջադրման խոչընդոտը, հիշեցնենք, կարող է լինել վերջին տասը տարիների ընթացքում նրա՝ Արցախում չբնակվելը։ Սա Սահմանադրությամբ արգելում է վերջինիս առաջադրվել որպես նախագահի թեկնածու։
Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանը «Առաջին լրատվական»-ի հետ զրույցում նշեց՝ ամեն ինչ պետք է արվի նախևառաջ օրենքի սահմաններում. «Սա պարտադիր պայման է բոլորի համար։ Մնացած բաները պետք է հենց օրենքից բխեն, հենց այս հրամայականից»։
Բաբայանը նշեց՝ հարցն իրավական հարթության մեջ է. «Պետք է բոլոր տեսակետներից նայենք, տեսնենք, թե ինչպես է հնարավոր։ Սա զուտ իրավական խնդիր է, քաղաքականացնել պետք չէ։ Իրավաբանները, այդ ոլորտի մասնագետները պետք է նայեն ու իրենց կարծիքը հայտնեն։ Եթե օրենքով հնարավոր է՝ թող կարգավորվի»։
Արդյոք պաշտոնական Ստեփանակերտը Բաբայանի հնարավոր առաջադրման հետ կապված ունի՞ մտահոգություններ՝ հարցին ի պատասխան Դավիթ Բաբայանն ասաց. «Եթե ինչ-որ մի քայլ, մի գործունեություն օրենքի սահմաններում է, ի՞նչ մտահոգություններ պետք է լինեն։ Պետք է ամեն ինչ անել, որ օրենքը պահպանվի, երբ օրենքը չի պահպանվում, խախտվում է օրենքը, այդ ժամանակ մտահոգություն կհայտնենք, այլ տարբերակ չկա։ Անկախ նրանից՝ քաղաքական գործընթաց է, հասարակական, թե այլ՝ մտահոգություն չի լինի, կարևորը օրենքի հարցն է, օրենքի պահպանությունը»։
Ո՞ւմ է պաշտպանելու նախագահ Սահակյանը 2020 թվականին կայանալիք ընտրություններում՝ հարցին ի պատասխան Դավիթ Բաբայանը ասաց. «Կան մարդիկ, ովքեր, գիտեք, ասել են՝ կարող են մասնակցել այդ ընտրություններին։ Սա ամեն մարդու իրավունքն է, եթե օրենքին չի հակասում. իսկ թե ով կընտրվի՝ որոշելու է Արցախի Հանրապետության քաղաքացին իր քվեով»։
Շարունակելով իր միտքը՝ Դավիթ Բաբայանն ընդգծեց. «Բակո Սահակյանը չի կարող առաջադրվել, մնացածն արդեն քաղաքացիների որոշելիքն է, դա փակ գաղտնի քվեարկություն է»։
Մեր այն դիտարկմանը՝ արդյոք Սահակյանը քաղաքացիներին կոչ կանի՞ ընտրելու որևէ թեկնածուի՝ շեշտելով, որ այդ անձը կարող է շարունակել իր գործունեությունը, Դավիթ Բաբայանը պատասխանեց. «Վաղաժամ է այդ մասին խոսել։ Գործընթացն իհարկե բաց է լինելու, բայց թեկնածուների հետ կապված՝ ամեն մարդ ինքն է որոշում։ Ամեն ինչ պետք է լինի օրենքի սահմաններում, որևէ մեկի համար արտոնյալ պայմաններ չեն լինելու։ Արցախը հայտնի է ընտրությունների անցկացման բարձր մակարդակով, այստեղ խախտումներ չեն եղել, հետևաբար մենք պետք է այս ոճը պահենք։ Գործող նախագահը Արցախի Հանրապետության Սահմանադրության երաշխավորն է, շահերի պաշտպանը, և այդ տեսանկյունից պետք է դիտարկենք նրա դերակատարությունը գալիք ընտրություններում»,-եզրափակեց նա։
Ի դեպ՝ առաջիկա նախագահական ընտրություններին անդրադարձել է նաև Արցախի նախկին փոխվարչապետ Արթուր Աղաբեկյանը՝ իր ֆեյսբուքյան էջում գրելով, որ երկրի հաջորդ նախագահը պետք է լինի Արայիկ Հարությունյանը, և նա այլընտրանք չունի։
Թե ով կլինի Արցախի հաջորդ նախագահը՝ դժվար է ասել։ Համենայնդեպս, այս պահի դրությամբ՝ արցախցիների համար հստակ ֆավորիտներ չկան։ «Առաջին լրատվական»-ի հետ զրույցում արցախցի իրավապաշտպան Կարեն Օհանջանյանն ասաց. «Արցախի յուրաքանչյուր քաղաքացի իրավունք ունի մասնակցելու ընտրություններին՝ մանավանդ նրանք, ովքեր մեծ ներդրում ունեն Ղարաբաղյան շարժման մեջ, Արցախի պետության ստեղծման, բանակի ձևավորման ու հաղթանակների մեջ։ Ուստի ես ամեն մի մարդու մասնակցության իրավունքը ողջունում եմ, չնայած որ կոնկրետ Սամվել Բաբայանի դեպքում մեր Սահմանադրությամբ արգելքներ կան։ Առաջիկայում պարզ կդառնա, թե խնդիրն ինչ լուծում կստանա»։
Մեր զրուցակիցը նաև չի կարծում, թե մասնակցության համար ստորագրահավաք սկսելը կարող է լուրջ խնդիրներ առաջացնել Արցախում, բայց և վստահ չէ, որ դա հնարավոր կլինի անել մարտ ամսին, երբ դեռ նախընտրական քարոզարշավը չի մեկնարկել: «Ի դեպ, նախընտրական պայքարը միայն այս երկու թեկնածուներով հնարավոր է և չսահմանափակվի, կարող է առաջիկայում ի հայտ գա այլ թեկնածու, ում ժողովուրդն ավելի շատ կհամակրի։ Անձամբ ես առայժմ նախապատվություն չունեմ»,- եզրափակեց նա։
