Կորեայի Հանրապետությունն ԱՄՆ-ի հետ կայացած կոնսուլտացիաների հերթական փուլի ընթացքում համաձայնել է մինչև մոտավորապես 1 միլիարդ դոլար ավելացնել Կորեական թերակղզու հարավում տեղաբաշխված ամերիկյան զորքերը պահելու հատկացումները: Փետրվարի 4-ին այս մասին հայտնել է CNN հեռուստաալիքը՝ վկայակոչելով Պետդեպարտամենտի երկու աղբյուր: Նրանց տվյալներով՝ համապատասխան համաձայնագրի գործողության ժամկետը սահմանափակված է մեկ տարով:
Այնուհետև կողմերը կարող են այն երկարաձգել ևս մեկ տարով, ճշտել են հեռուստաընկերության աղբյուրները: Ինչպես տեղեկացրել է KBS հեռուստաալիքը՝ վկայակոչելով դիվանագիտական մի աղբյուր, հենց ԱՄՆ-ն է զիջումների գնացել ամերիկյան զորքերը պահելու ծախսերի վճարման հարցում: Ավելի վաղ ամերիկյան կողմը Հարավային Կորեայից պահանջում էր մինչև 1.2 միլիարդ դոլար, ըստ որում անցյալ տարի Սեուլի վճարը կազմել է 860 միլիոն դոլար, հաղորդել է ՏԱՍՍ-ը: