Օրերս կրթության և գիտության նախարար Արայիկ Հարությունյանն այցելել էր Արարատի մարզի Այգեստան համայնքի միջնակարգ դպրոց, որտեղ հանդիպել էր դպրոց այցելած քահանայի, ինչը նրան վրդովեցրել էր։ Այս առիթով Արարատյան հայրապետական թեմի Բյուրավանի Սուրբ Գրիգոր Լուսավորիչ եկեղեցու հոգևոր հովիվ տեր Ղազար քահանա Պետրոսյանը հանդես է եկել հայտարարությամբ, որ հայոց դպրոցի և դպրության հիմնադիրը հայոց քահանան է եղել՝ հայոց գրերի ստեղծող Մեսրոպ Մաշտոցը ևս Հայ Առաքելական Սուրբ եկեղեցու քահանա է եղել։ Այս միջադեպը ինչի՞ մասին է խոսում «Առաջին լրատվական»-ի հարցին Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցը պատասխանեց․ «Այս միջադեպում արտահայտվում են կամ դրսևորվում են մի շարք խնդիրներ։ Իհարկե, հիմքում պետության և եկեղեցու փոխհարաբերությունն է, որը, ցավոք սրտի, լուծում տված է ոչ թե բովանդակային տեսակետից, այլ քաղաքական նպատակահարմարությունից ելնելով։ Ինչո՞ւ, որովհետև այդ դիսկուսիան կամ բանավեճը այդ խնդրի լուծման վերաբերյալ չեն ձևավորվել քննարկումների արդյունքում, այլ քաղաքական որոշումների արդյունքում։ Իշխանությունը լեգիտիմության կարիք է ունեցել, որն իրականացրել է նաև եկեղեցու միջոցով։ Այսինքն՝ իշխանության լեգիտիմության գրավականներից մեկը եղել է Հայ Առաքելական եկեղեցին։ Բովանդակության առումով այն հանդիսանում է կրոնապետության էությանը համապատասխան վարքագիծ»։
«Ժողովրդավարական պետության մեջ կարծիքների բազմազանությունը, բազմակարծությունը, բազմակուսակցականությունը հիմնական սկզբունքներից մեկն է, որոնց հիման վրա էլ պետք է ձևավորվի քաղաքական իշխանությունը։ Մյուս կողմից՝ երբ առնչվում ենք եկեղեցուն, ապա, ուզենք թե չուզենք, հանգում ենք խղճի և դավանանքի ազատության հետ, որն անհատական իրավունք է։ Այս հարցում պետությունն ունի չմիջամտելու պարտավորություն»,- հավելեց բանախոսը։
Մանրամասները՝ տեսանյութում։
