Եվրահանձնաժողովը հերքել է վրացական ԶԼՄ-ների տարածած հաղորդագրություններն այն մասին, որ Բառոզուն Վրաստանին առաջարկել Է ԵՄ-ին անդամակցելու հայտ ներկայացնել: Այդ մասին այսօր հայտնում են ռուսաստանյան մի շարք գործակալություններ հղում կատարելով` Եվրահանձնաժողովի տարածած հաղորդագրությանը: «Եվրամիությանը Վրաստանի անդամակցության մասին խոսք չի եղել, քննարկվել են ասոցիացիայի եւ ազատ առեւտրի գոտու ստեղծման համաձայնագրի շուրջ ընթացող բանակցությունների թեմաները»,-հայտարարել է Եվրահանձնաժողովի ներկայացուցիչը, այլ խոսք է գնացել էներգետիկ միությանը միանալու հայտի մասին: Միխեիլ Սաակաշվիլիի հետ հանդիպման արդյունքների շուրջ չորեքշաբթի Բրյուսելում կայացած մամուլի ասուլիսում, որից մեջբերումներ են արել վրացական զանգվածային լրատվամիջոցները, Բառոզուն հայտարարել է. «Հուլիսին մենք Վրաստանի հետ բանակցություններ սկսեցինք ասոցիացիայի շուրջ: Այդ բանակցությունների կարեւոր բաղադրիչն է ազատ առեւտրի գոտու ստեղծման վերաբերյալ համաձայնագիրը, բայց թե երբ մենք երկխոսություն կսկսենք ազատ առեւտրի գոտու շուրջ, կախված է մեր վրացի գործընկերներից»: