Հռոմի պապ Բենեդիկտոս 16-րդի կոնդակով Հայաստանի, Վրաստանի և Արևելյան Եվրոպայի հայ կաթոլիկների նոր ղեկավար է նշանակվել Վատիկանի հայ կաթոլիկ հեռուստատեսության՝ «Տելեպաչե Արմենիա»-ի հիմնադիր Ռաֆայել Մինասյանը: Այս մասին «Բլագովեստ-ինֆո»-ին ասել են Լիբանանի մայրաքաղաքում գտնվող Հայ կաթոլիկ եկեղեցու պատրիարքարանում:
Ավելի վաղ այս պաշտոնը զբաղեցնում էր Մխիթարյանների միաբանության անդամ Վահան Օհանյանը: Ռաֆայել Մինասյանը ծնվել է 1946 թ. Լիբանանում: Նա մեծ ներդրում է ունեցել Լիբանանի հայկական կաթոլիկ համայնքի զարգացման գործում: Նրա ջանքերով է 1984 թ.-ին ստեղծվել «Սուրբ խաչ» սկաուտական ջոկատը: Բացի այդ, նա հիմնադրել է Armenian Alliance բարեգործական հիմնադրամը, որը բնակարաններով է ապահովում Հայաստանի չքավոր ընտանիքներին:
