Հարավաֆրիկյան գիտնականների կարծիքով «Համլետի» հեղինակը մարիխուանա է ծխել և կոկաին օգտագործել: Այս մասին գրում է իտալական Corriere della Sera-ն: «Վերջին տասնամյակում բրիտանացի ամենահայտնի պոետի կյանքի վերաբերյալ տասնյակ տարբեր վարկածներ են հնչեցվել: Սակայն այն, ինչ ներկայացրել են հարավաֆրիկացի գիտնականները, իրոք անսովոր է: Գիտնական Ֆրենսիս Թեքերեյի ղեկավարած խումբը խնդրել է Անգլիկան եկեղեցուն թույլատրել իրականացնել Շեքսպիրի մարմնի արտաշիրմումը»,- գրել է թերթը:
Մինչ այդ հարավաֆրիկացի գիտնականները Շեքսպիրի տան բակում իրականացված պեղումների արդյունքում հայտնաբերել են կանաբիսի և կոկաինի հետքեր զանազան ծխամորճերի վրա: Այս հայտարարությունները լուրջ դժգոհություններ են առաջացրել Շեքսպիրի երկրպագուների շրջանում: Սակայն արտաշիրմելու թույլտվությունը կպարզի գիտնականների իրավացիությունը կամ սխալականությունը:
Հարավաֆրիկացիների վարկածի հաստատվելու դեպքում մեծ բացահայտում կլինի նաև այն, որ կոկաինն Անգլիա է հասել արդեն Շեքսպիրի ժամանակաշրջանում: Մինչ այդ հետազոտողները կարծում էին, որ այն Անգլիա է բերվել միայն 19-րդ դարում:
