Հայկական շախմատի ներկայացուցիչները աղմուկ են բարձրացրել նախկին «Միկա» մարզահամալիրում գործող գրոսմայստերներ Գաբրիել Սարգսյանի և Լևոն Արոնյանի դպրոցի ֆինանսավորման դադարեցման վերաբերյալ: «Այդ որոշումը կայացրել է կառավարությունը: Այո՛, այդ դպրոցի պետական ֆինանսավորումը դադարեցվել է, բայց մարզումները և դասընթացները շարունակվում են: Այս կառույցները շատ կարևոր են հայկական շախմատի համար, և սպասում ենք ֆինանսավորողների դրսից, որպեսզի կարողանանք շարունակել աշխատանքները: Մեր լավ սաներից շատերն այդ դպրոցներից են, բարձր արդյունքներ են ցույց տալիս: Կառավարությունը գիտի այս խնդրի մասին, կարծում եմ՝ կլինի ինչ-որ որոշում մարզադպրոցների ֆինանսավորման հարցով: Ցանկալի կլինի, որ պահպանվեն դպրոցները»,- լրագրողների հետ հանդիպմանն ասել էր Հայաստանի շախմատի ֆեդերացիայի փոխնախագահ Սմբատ Լպուտյանը:
Տեղի ունեցածին ավելի կտրուկ է արձագանքել Գաբրիել Սարգսյանը՝ նշելով, որ մեր երկրի նոր իշխանությունը ուղղակիորեն փորձում է փակել աշխարհի լավագույն շախմատի դպրոցներից մեկը: Նշենք, որ Հայաստանի շախմատի ֆեդերացիան 2004 թվականից գլխավորում է Հայաստանի 3-րդ նախագահ Սերժ Սարգսյանը: Վերջինիս կողմից մարզական կառույցի ղեկավարի պաշտոնից հեռանալու մտադրության մասին որևէ հայտարարություն չի եղել: Մարզադպրոցի ֆինանսավորման դադարեցմանն անդրադարձել է նաև ՀՀ սպորտի և երիտասարդության հարցերի փոխնախարար Գևորգ Լոռեցյանը: Վերջինս armtimes.com-ի թղթակցի հետ զրույցում նշել է, որ գրոսմայստերական մարզադպրոցի ֆինանսավորումը դադարեցվել է, քանի որ «Միկա» մարզահամալիրը պետական մի կառույցից անցել է մյուսի:
Նշենք, որ «Միկա» մարզահամալիրը գտնվում էր ՊԵԿ-ի ենթակայության տակ, սակայն վերջերս այն փոխանցվել է սպորտի նախարարությանը: «ՊԵԿ-ն իր արտաբյուջետային հաշվից է վճարել այդ մասնագետներին, նրանք ստացել են մոտ 400-500 հազար դրամ աշխատավարձ: Դպրոցի ֆինանսավորումը եղել է ամսական մոտ 1.5 մլն դրամ, որը որպես աշխատավարձ բաշխվել է 4 հոգու միջև: Հիմա «Միկան» փոխանցվել է սպորտի նախարարությանը, և ՊԵԿ-ն աշխատավարձ տալու իրավունք չունի: Ես նրանց առաջարկեցի մեր սովորական մարզադպրոցներում գրանցվել որպես մարզիչ և իրենց մարզումները «Միկա»-ում շարունակել:
Այստեղ խնդիրն այն է, որ մարզադպրոցի մարզիչները, ինչպես ամբողջ ՀՀ-ում, պետք է ստանային 120-150 հազար դրամ աշխատավարձ: Բնականաբար, չեն համաձայնում, որովհետև ստանում էին, օրինակ, 500 հազար, ու հիմա աղմուկ են բարձրացնում: Եթե նրանց 500 հազար տաս, ըմբշամարտի մարզիչը կգա կասի՝ ես էլ աշխարհի չեմպիոն եմ պատրաստել, ինձ ինչո՞ւ ես 100 հազար տալիս: Խնդիրը զուտ ֆինանսական է»,- նշել է Լոռեցյանը:
Տեղի ունեցած զարգացումներն ըստ էության վկայում են այն մասին, որ ՀՀ կառավարությունը նպատակ չունի Լևոն Արոնյանի և Գաբրիել Սարգսյանի մարզադպրոցը փակելու: Եթե այն իսկապես օգուտ է տալիս մարզաձևին, ապա Հայաստանի շախմատի ֆեդերացիան ցանկության դեպքում, կարծում ենք, ի զորու է պահպանել: Շախմատը Հայաստանի հենակետայի մարզաձևերից է, որին աջակցություն ցուցաբերելը պատիվ կբերի յուրաքանչյուր գործարարի կամ շարքային քաղաքացու:
Հայաստանի շախմատի ֆեդերացիայի նախագահի համար, կարծում ենք, մեծ ջանքեր չեն պահանջվի ամսական 1.5 միլիոն դրամ հայթայթելը մարզադպրոցի բնականոն աշխատանքն ապահովելու համար: Ստեղծված իրավիճակում, սակայն, Հայաստանի շախմատի ֆեդերացիան և վերջինիս նախագահը բոլորովին այլ մարտավարություն են որդեգրել: Օգտագործելով մարզաձևի մեր երկրում մասսայական լինելու հանգամանքը, ինչպես նաև Լևոն Արոնյանի և Գաբրիել Սարգսյանի հեղինակությունն ուղղակիորեն փորձ է արվում պախարակելու գործող իշխանություններին: Այս կերպ Սերժ Սարգսյանը սկիզբ է դնում մեր երկրում մարզական ընդդիմադիր ճակատի ձևավորմանը:
Սերժ Սարգսյանի պաշտոնավարման տարիներին մեր երկրում չի եղել մարզական ընդդիմադիր ճակատ: Ավելի ստույգ՝ ՀՀ նախագահը գլխավորում էր շախմատը, նրա մտերիմներից Ռուբեն Հայրապետյանը՝ ֆուտբոլը, իսկ հենակետային մյուս մարզաձևերը՝ ծանրամարտն ու ըմբշամարտը, ՀԱՕԿ նախագահ Գագիկ Ծառուկյանի ենթակայության տակ էին: Բռնցքամարտի ֆեդերացիայի նախագահ էլ մինչ օրս նախկին ՀՀԿ-ական Արթուր Գևորգյանն է: Ներկայում ֆուտբոլի ֆեդերացիայի նախագահը ԱԱԾ տնօրեն Արթուր Վանեցյանն է, ըմբշամարտն ու ծանրամարտը շարունակում են մնալ Ծառուկյանի հովանավորության ներքո: Թե Արթուր Գևորգյանը, թե Գագիկ Ծառուկյանը և առավել ևս Արթուր Վանեցյանը ՀՀ իշխանություններին ընդդիմանալու նպատակ չունեն:
Ու փաստորեն, մեր երկում առաջացել է բոլորովին նոր իրավիճակ, և մասսայականություն և հեղինակություն վայելող մարզաձևը գտնվում է ընդդիմադիր կուսակցության առաջնորդի ձեռքում: Ավելին, մարզական ընդդիմադիր բևեռն ուղիղ կերպով հակադարձում է իշխանությանը:
Գաղտինք չէ, որ սպորտը հիանալի միջոց է հասարակության լայն զանգվածներ համախմբելու, ինչու չէ՝ նաև կառավարելու և մանիպուլյացիայի ենթարկելու համար: Կարծում ենք՝ պարզ է, որ Սերժ Սարգսյանը առաջիկայում ոչ միայն չի հեռանա Հայաստանի շախմատի ֆեդերացիայի նախագահի պաշտոնից, այլև մարզաձևի ռեսուրսը կփորձի օգտագործել ոչ սպորտային նպատակներով: