Անցած տարեվերջին հայտնի դարձավ, որ «Գազպրոմ Արմենիա» ընկերությունում ՊԵԿ-ը ստուգումներ է սկսել։ Ավելին, որոշակի չարաշահումներ էին հայտնաբերվել ՊԵԿ-ի կողմից։ Նախօրեին, սակայն, լրագրողների հետ հանդիպման ժամանակ ՊԵԿ նախագահ Դավիթ Անանյանը հայտարարեց, որ «Գազպրոմ Արմենիա» ընկերությունում սկսված ստուգումներն այս պահին կասեցված են և հորդորեց այդ ստուգումները չպայմանավորել գազի գնի թանկացմամբ, վերանայումներով։ «Մենք արդեն մամուլի հաղորդագրություն ենք տվել, որ այնտեղ արդեն կա որոշակի քննչական գործողություններ կատարելու անհրաժեշտություն։ Ընթացիկ գործընթացը շարունակվում է, խորհուրդ կտայի գազի սակագնի փոփոխության կամ այդպիսի ակնկալիքները որևէ կերպ մեր ընթացիկ գործողությունների հետ չկապել։ Որովհետև առաջին անգամ չէ, որ ՊԵԿ-ը «Գազպրոմ Արմենիա» ընկերությունում ստուգում է իրականացնում, ուղղակի գազալցակայանների այդ գործողությունների համատեքստում թեման մի փոքր ավելի հանրային հնչեղություն ստացավ»,- նշել էր Դավիթ Անանյանը։
Նշենք, որ ստուգումներ սկսելու վերաբերյալ ՊԵԿ-ի գործողությունները շատ ցավոտ ընդունվեցին «Գազպրոմ Արմենիա»-ի կողմից։ Դրանք որակվեցին որպես անհիմն և ընկերության բարի համբավն արատավորող։
Քաղաքագետ Ռուբեն Մեհրաբյանի խոսքերով՝ ստուգումների կասեցումը պատահական չէ, քանի որ իր անձնական տպավորություններով հայ-ռուսական հարաբերություններում ընդհանրապես, և հատկապես գազային ոլորտում հարաբերությունների զարգացումը գնում է անցյալի իներցիայով, որի ճանապարհին Հայաստանը փորձեց որոշակի դաստիարակչական աշխատանք տանել, սակայն ապարդյուն։ «Ռուսական կողմից չկա ցանկություն դա փոխելու։ Իսկ հայկական կողմից, իմ տպավորությամբ, առայժմ չկա պատկերացում, թե դեպի ուր պետք է փոխվեն այդ հարաբերությունները և, առհասարակ, դա հնարավոր է, թե ոչ, քանի որ այն ամենը, ինչ կապված է Ռուսաստանի հետ, կապված է գողության, ոչ թափանցիկության, մի գործունեության, որն ավելի նման է բանդիտիզմի, քան բիզնեսի։ Դա պարզապես նրանց աշխատաոճն էր, եթե այդ ճանապարհին Հայաստանը փորձի նրանց դաստիարակել, ապա դա քիչ հնարավոր է և անիմաստ ջանքեր»,- «Առաջին լրատվական»-ի հետ զրույցում ասաց Մեհրաբյանը։
Մեր դիտարկմանը՝ ՊԵԿ-ի կողմից «Գազպրոմ Արմենիա» ընկերությունում ստուգումները դաստիարակչական նպատա՞կ էին հետապնդում, քաղաքագետը պատասխանեց. «Այն, ինչ վերաբերում է օրինականության դաշտում խնդիրների լուծմանը, Ռուսաստանում դրան նայում եմ շատ էմոցիոնալ, ընկալում են որպես չուզողություն։ Այդ ֆոնին, այո, Հայաստանը փորձեց որոշակի քայլեր ձեռնարկել, սակայն հետնահանջը, ստուգումների կասեցումը նշանակում է, որ այդ դաստիարակչական աշխատանքները բացասաբար են անդրադառնում Հայաստանի վրա, արագ լուծումներ չկան, դրա համար էլ հետնահանջը դառնում է հասկանալի։ ՊԵԿ-ի կողմից սկսված ստուգումները մի ուղերձ էր Ռուսաստանին, որ այն, ինչ դուք անում եք, լուրջ հիմքեր կան, որ այդտեղ կա հանցակազմ, և Հայաստանը ունի լուրջ հնարավորություն այդ ամենը ջրի երես հանելու համար։ Իսկ ստուգումների դադարեցումը, իր հերթին, ուղերձ էր, որ Հայաստանը միտված է խնդիրները դրական հունով լուծելու համար։ Այդ ուղերձով էլ ներկայումս շարունակվում են բանակցությունները, որոնք վարում է փոխվարչապետ Մհեր Գրիգորյանը։ Թե ինչ լուծում է լինելու, դեռ պարզ չէ։ Միայն հայտնի է, որ սահմանին գազի գինը 15 դոլարով թանկանալու է, բայց նաև հայտնի է, որ վերջնական լուծում չկա։ Կա միայն ցանկություն, որ ընկերությունը բարձրացնի իր աշխատանքի էֆեկտիվությունը, աջ ու ձախ փող չծախսի ու այդ ծախսերը չներառի իր ծառայությունների ինքնարժեքի մեջ, որովհետև դա ոչ թե աշխատանք է, այլ պարզապես թալան։ Նրանք իրենց գործունեությամբ ՀՀ-ին պարզապես ապուշի տեղ են դրել։ Տարիներով դա այդպես է եղել, բայց ներկայիս իշխանությունները փորձում են ցույց տալ, որ դա չեն հանդուրժելու»։
Ինչ վերաբերում է ՊԵԿ նախագահի հորդորին՝ իրենց կողմից իրականացվող ստուգումները որևէ կերպ չկապել գազի գնի հետ, ապա, քաղաքագետի խոսքերով՝ այս ստուգումներում և գազի գնի միջև կապ և՛ կա, և՛ չկա։ «Մեծ հաշվով, ՊԵԿ-ը կատարում է իր պարտականությունները, բայց միևնույն ժամանակ դա անում է շատ կոնկրետ համատեքստում»,- եզրափակեց Մեհրաբյանը։