Հոկտեմբերի 17-ին Սիրիայի նախագահ Բաշար Ալ-Ասադը ժամանել է Սաուդյան Արաբիա, որտեղ նա երկկողմ եւ տարածաշրջանային բազմաթիվ հարցերի վերաբերյալ բանակցություններ կվարի Սաուդյան Արաբիայի թագավոր Աբդալլահ բիեն Աբդ Ալ-Ազիզի հետ:
Հիշեցնենք, որ մոտ մեկ տարի առաջ` 2009թ. հոկտեմբերին, Սաուդյան Արաբիայի թագավորը հնգամյա դադարից հետո պաշտոնական այցով ժամանեց Դամասկոս: Այս տարվա հուլիսին Սիրիայի եւ Սաուդյան Արաբիայի ղեկավարները հանդիպել են Լիբանանում: Նույն ժամանակահատվածում Սիրիան Էլ-Ռիյադ վերադարձրեց իր դեսպանին, ում պաշտոնը թափուր էր մնացել 2008թ.-ից: Երկու երկրների հարաբերությունները վատացել էին Լիբանանի նախկին վարչապետ Ռաֆիկ Հարիրիի սպանությունից հետո, երբ սաուդցիները մեղադրեցին սիրիական կողմին այդ սպանության մեջ: 2008թ. Սաուդյան Արաբիան իր դեսպանին տեղափոխել էր Դամասկոսից Քաթար, իսկ Դամասկոսում դեսպանի պաշտոնը մնացել էր թափուր:
Ռաֆիկ Հարիրին սպանվել է 2005թ. փետրվարին` ահաբեկչության արդյունքում: Նրա հետ զոհվեցին եւս 20 հոգի: