Ադրբեջանական 1news.az կայքի փոխանցմամբ՝ թյուրքալեզու երկրների հերթական գագաթնաժողովը կայանալու է այս տարվա սեպտեմբերին ղազախական Ալմաթի քաղաքում։ Այս մասին հայտարարել է թյուրքալեզու երկրների համագործակցության խորհրդի գլխավոր քարտուղար Հալիլ Աքընջըն։
Վերջինս լրագրողներին հայտնել է, որ այդ գագաթնաժողովի նախապատրաստման մանրամասները քննարկվել են Ղազախստանի արտգործնախարարի հետ հանդիպման ժամանակ։
Գագաթնաժողովում Թուրքիան ներկայացնելու են նախագահ Աբդուլլահ Գյուլը և արտգործնախարար Ահմեդ Դավութօղլուն։
Գագաթնաժողովում քննարկվելու է տարբեր ոլորտներում թյուրքալեզու երկրների միջև համագործակցությունը և դրա հեռանկարները։ Կընդունվեն մի շարք որոշումներ։
Հիշեցնենք, որ թյուրքալեզու երկրների ղեկավարների 10-րդ գագաթնաժողովը տեղի է ունեցել 2010 թվականի սեպտեմբերին Ստամբուլում։