Լոնդոնի «Արսենալի» ղեկավարությունը քայլեր է ձեռնարկում կադրային խնդիրները կարգավորելու համար: Ունայ Էմերիի գլխավորած թիմում այսօր կաղում են հատկապես միջին և պաշտպանական օղակները: Ըստ բրիտանական աղբյուրների՝ «Արսենալը» ցանկանում էր ձեռք բերել 35-ամյա պորտուգալացի պաշտպան Պեպեին, որը ֆինանսական խնդիրների պատճառով խզել էր պայմանագիրը թուրքական «Բեշիկթաշի» հետ: Նշվում է, որ Պեպեն չի ցանկացել խաղալ լոնդոնյան ակումբում՝ համաձայնության գալով ֆրանսիական «Մոնակոյի» հետ:
Բրիտանական լրատվամիջոցները գրում են նաև, որ այսօր «Արսենալը» բանակցում է իտալական «Կալյարիի» կիսապաշտպան Նիկոլո Բարելլայի հետ: Վերջինս ընդամենը 21 տարեկան է, սակայն անցկացնելով փայլուն մրցաշրջան՝ գրավել է մի շարք գրանդ ակումբների ուշադրությունը: Մասնավորապես, «Նապոլին» Բարելլայի տրանսֆերի համար «Կալյարիին» 50 միլիոն եվրո է առաջարկել: «Նապոլին» այս ֆուտբոլիստի համար պայքարում «Արսենալի» գլխավոր մրցակիցն է: Բարելլան կենտրոնական կիսապաշտպան է, սակայն հաջող է գործում հենակետային դիրքում:
The Sun պարբերականն էլ այսօր տեղեկություն է տարածել, որ «Արսենալը» մոտ է «Բարսելոնայի» կիսապաշտպան Դենիս Սուարեսի հետ պայմանագիր կնքելուն: Պարբերականը հիշատակում է այն հանգամանքը, որ Էմերին ժամանակին աշխատել է Սուարեսի հետ «Սևիլիայում» և շատ քաջատեղյակ է նրա հնարավորություններին:
Որոշ վերլուծաբաններ կարծիք են հայտնել, որ Սուարեսի տեղափոխության արդյունքում «Արսենալի» կազմում կարող է տուժել Հայաստանի հավաքականի ավագ Հենրիխ Մխիթարյանը: Չնայած Սուարեսը ավելի հաճախ խաղում է կիսապաշտպանության կենտրոնում, այնուամենայնիվ նա հաջող է կատարում նաև ձախ վինգերի, ինչպես նաև ենթահարձակվողի պարտականությունը: Այս ամենը հաշվի առնելով՝ The Sun-ը գրում է, որ առաջիկայում Մխիթարյանի տեղը թիմի մեկնարկային կազմում կարող է հարցականի տակ լինել:
Նշվում է նաև, որ Էմերին շատ է վստահում Սուարեսին: «Էմերին վստահում է նաև Մխիթարյանին, որն այս մրցաշրջանում արդեն 20 հանդիպման է մասնակցել: Սակայն Հայաստանի հավաքականի ավագը մի քանի անգամ ձեռքից բաց է թողել գոլի հեղինակ դառնալու իրական հնարավորությունը, մասնավորապես «Տոտենհեմի» և «Մանչեսթեր Յունայթեդի» հետ խաղերում»,- գրում է The Sun-ը:
Չնայած այս դիտարկումներին՝ կարծում ենք, որ թե՛ Բարելլայի և թե՛ Սուարեսի տեղափոխությունը չի կարող խանգարել Մխիթարյանին: Հաշվի առնելով այն, որ վերը նշված երկու ֆուտբոլիստները ավելի հաճախ խաղում են կիսապաշտպանության կենտրոնում, ակնհայտ է դառնում, որ «Արսենալի» ղեկավարները առաջին հերթին մտադիր են կարգավորել միջին հատվածը: Արդեն իսկ նշվում է, որ «Արսենալի» կենտրոնական կիսապաշտպան Աարոն Ռեմսին նախնական պայմանագիր է կնքել Թուրինի «Յուվենտուսի» հետ և առաջիկա ամռանը կհամալրի իտալական թիմի շարքերը: Բնական է, որ «Արսենալը» լուրջ քայլեր պետք է ձեռնարկի առանցքային կիսապաշտպանին արժանի փոխարինող գտնելու համար:
Մի քանի օր առաջ տեղեկություն էր տարածվել, որ «Արսենալը» բանակցություն է սկսել չինական «Դալյան Իֆանի» բելգիացի կիսապաշտպան Յանիկ Ֆերեյրա Կարասկոյի հետ: Նշվում էր, որ բելգիացի ֆուտբոլիստը ցանկանում է վերադառնալ Եվրոպա և կարիերան շարունակել Անգլիայի Պրեմիեր լիգայում: Որոշ լրատվամիջոցներ նույնիսկ գրում էին, որ Կարասկոն արդեն իսկ համաձայնել է պայմանագիր կնքել «Արսենալի» հետ: Նախկինում նշվում էր, որ Բելգիայի ազգային հավաքականի կիսապաշտպանի ծառայություններով հետաքրքրված են «Մանչեսթեր Յունայթեդը» և «Յուվենտուսը»:
Հիշեցնենք, որ Հենրիխ Մխիթարյանը շարք կվերադառնա միայն առաջիկա փետրվարին: Տարեվերջին հայ ֆուտբոլիստի աջ ոտնաթաթի հատվածում հայտնաբերվել էր կոտրվածք: Դեկտեմբերի 19-ին Անգլիայի լիգայի գավաթի խաղարկության քառորդ եզրափակչում «Արսենալը» լոնդոնյան դերբիում «Էմիրեյթս» մարզադաշտում 0:2 հաշվով զիջել էր «Տոտենհեմին»: Մխիթարյանը ընդմիջմանը փոխարինվել էր: Լոնդոնցի լրագրող Չարլզ Ուոթսը թվիթերյան իր էջում կարծիք է հայտնել, որ Հայաստանի հավաքականի ավագը վնասվածք է ստացել «Տոտենհեմի» կիսապաշտպան Լուկաս Մոուրոյի հետ բախման դրվագում:
«Կարծում եմ՝ Մխիթարյանը վնասվածք ստացավ այն պահին, երբ տուգանային հրապարակում փորձում էր «կրակել» «Տոտենհեմի» դարպասին: Գնդակին հարվածելու փոխարեն՝ նա հարվածեց Մոուրոյի ոտքին: Ակնհայտ էր, որ Մխիթարյանի համար շատ ցավոտ էր»,- նշել էր Ուոթսը: Վերլուծաբանները չեն բացառում, որ Մխիթարյանը կվերսկսի մարզումները հունվարի վերջին և կմասնակցի փետրվարի 3-ին կայանալիք «Մանչեսթեր Սիթիի» հետ արտագնա հանդիպմանը:
21-րդ տուրից հետո «Արսենալը» 41 միավորով 5-րդ հորիզոնականում է և 3 միավորով զիջում է 4-րդ տեղում գտնվող «Չելսիին»: Մրցաշարային աղյուսակը 54 միավորով շարունակում է գլխավորել «Լիվերպուլը»: Երկրորդ տեղում գտնվող «Մանչեսթեր Սիթին» ունի 50, իսկ լավագույն եռյակը եզրափակող «Տոտենհեմը»՝ 48 միավոր: