Միջին քաշային կարգում աշխարհի նախկին չեմպիոն, Գերմանիայի դրոշի ներքո հանդես եկող, հայ պրոֆեսիոնալ բռնցքամարտիկ Արթուր Աբրահամը այսօր Վլադիմիր Ենգիբարյանի անվան բռնցքամարտի դպրոց էր եկել՝ նվերներ բերելով դպրոցի սաներին։
Աշխարհահռչակ բռնցքամարտիկը լրագրողների հետ զրույցում ասաց, որ այսպիսով իր շնորհակալությունն է հայտնում սպորտդպրոցին, որտեղ չորս տարի մարզվել է։ «Ես իմ խորին շնորհակալությունն են հայտնում այս դպրոցին։ 1998 թ., երբ եկանք Երևան, ես սկսեցի հաճախել Ենգիբարյանի անվան բռնցքամարտի դպրոց, այստեղ եմ մարզվել, սովորել, լավ ընկերներ ձեռք բերել»,- ասում է Արթուր Աբրահամը։
Նվերները բռնցքամարտի համար անհրաժեշտ հագուստ, սպորտային կոշիկներ ու ձեռնոցներ են՝ նախատեսված մոտ 50 մարզիկի համար։ Բռնցքամարտիկը նույն նվերների 25 փաթեթ հատկացրել է նաև ազգային հավաքականին։
Արթուր Աբրահամը հույս ունի, որ այս նվերները կոգևորեն երիտասարդ սպորտսմեններին՝ ավելի ակտիվ զբաղվելու այս սպորտաձևով։
Ընդհանուր առմամբ, նվերների արժեքը կազմում է մոտ 100,000 եվրո։
