Թուրքիայի նախագահ Ռեջեփ Թայիփ Էրդողանի պաշտոնական ներկայացուցիչ Իբրահիմ Քալընի խոսքով՝ Սիրիայում Անկարայի գործողությունների մասին ԱՄՆ պետքարտուղար Մայքլ Փոմփեոյի հայտարարությունները հակասում են առողջ բանականությանը: Այս մասին հաղորդում է Anadolu գործակալությունը:
«Հայտարարությունն այն մասին, որ Սիրիայում Թուրքիայի թիրախը քրդերն են, զուրկ է առողջ բանականությունից: Անկարայի թիրախը ոչ թե քրդերն են, այլ ԴԱԻՇ-ի («Իսլամական պետություն»), Քուրդստանի բանվորական կուսակցության, «Ժողովրդական ինքնապաշտպանության ուժերի» և «Դեմոկրատական միություն» կուսակցության ահաբեկիչները»,-ասել է Քալընը:
Նրա խոսքով՝ «Սիրիայում Քուրդստանի բանվորական կուսակցության դեմ Թուրքիայի պայքարի նպատակն այդ խմբավորումից քրդերին պաշտպանելն է»:
Հինշաբթի Փոմփեոն խոսել է Սիրիայում կրոնական փոքրամասնությունների անվտանգության ապահովման և թուրքական ու քրդական ուժերի միջև բախում թույլ չտալու անհրաժեշտության մասին: