Ճապոնացի երկու ուսանողուհիներ՝ Միսաթո Կիվասակին և Մայա Օթակին պատրաստվում են շրջագայել աշխարհի շուրջ և ամուսնանալ 26 երկրներում, որտեղ նույնասեռական ամուսնություններն օրինականացվել են:
Ինչպես հաղորդում է ճապոնական The Asahi Shimbun պարբերականը, այս կերպ աղջիկները ցանկանում են ուշադրություն հրավիրել իրենց երկրում ԼԳԲՏ ներկայացուցիչների իրավունքների ոտնահարմանը:
Միսաթո Կիվասակին և Մայա Օթակին սովորում են Ուցոնոմիի համալսարանում, որտեղ և ծանոթացել են: Աղջիկները մեկ տարուց ավելի է ինչ հանդիպում են և վերջերս որոշել են ամուսնանալ: Սակայն Ճապոնիայի օրենքները նման իրավունք չեն տալիս և նրանք որոշել են ամուսնանալ իրենց երկրի սահմաններից դուրս:
Միսաթո Կիվասակիի և Մայա Օթակիի ճանապարհորդությունը կսկսվի մարտին Մեծ Բրիտանիայից: Աղջիկները նախատեսում են 6 ամսում այցելել Եվրոպայի, Աֆրիկայի, Հյուսիսային և Հարավային Ամերիկայի 26 երկրներ: Նախնական հաշվարկներով ուղևորությունը կարժենա մոտ 18.4 հազար դոլար: Դրա համար զույգը քարոզարշավ է կազմակերպել, որի միջոցով ցանկանում է հավաքել անհրաժեշտ գումարը: