Միացյալ Նահանգները մտադիր չէ հեռանալ Մերձավոր Արևելքից, չնայած Սիրիայից իր զինված ուժերի դուրսբերմանը և հավատարիմ կմնա տարածաշրջանի իր գործընկերներին: Այս մասին ԱՄՆ պետքարտուղար Մայքլ Պոմպեոյի Մերձավոր Արևելքի մի շարք երկրներ կատարելիք այցից առաջ ասել է պետդեպարտամենտի բարձրաստիճան ներկայացուցիչը լրագրողների համար կազմակերպված ճեպազրույցի ժամանակ:
Նրա խոսքերով, Վաշինգթոնը ԱՄՆ արտաքին քաղաքականության գերատեսչության ղեկավարի Մերձավոր Արևելք կատարելիք շրջագայությամբ ցանկանում է ցույց տալ, որ «Միացյալ Նահանգները չի հեռանում Մերձավոր Արևելքից»:
Բացի այդ, Պոմպեոն ցանկանում է ևս մեկ անգամ հավաստել իր գործընկերներին և դաշնակիցներին, որ «իրանական ռեժիմը տարածաշրջանում վտանգավոր խաղացող է հանդիսանում»: «Կայունության համար չկա ավելի մեծ սպառնալիք, քան Իրանի ռեժիմն է»,- ասել է պետդեպարտամենտի ներկայացուցիչը:
Միևնույն ժամանակ, պետդեպարտամենտը հայտարարել է, որ ամերիկյան զորքերի Սիրիայից դուրսբերման ճշգրիտ ժամկետները դեռ հաստատված չեն: