Google-ը երկու տարի առաջ, օգտագործելով իր դուստր ձեռնարկությունները Նիդեռլանդներում և Իռլանդիայում, հաջողել է հարկերից «թաքցնել» 19,9 մլրդ եվրո: Այս մասին հաղորդում է Reuters գործակալությունը:
Սխեման կոչվում է «կրկնակի իռլանդական՝ հոլանդական սենդվիչով»: Google-ի դեպքում այն այսպիսի տեսք է ունեցել․ ընկերությունը այս գումարը փոխանցել է Հոլանդիայում գտնվող դուստր ձեռնարկությանը` Google Nederland Holdings BV-ին, այնուհետև այդ գումարը փոխանցվել է քույր ձեռնարկության` Իռլանդիայում գրանցված Google Ireland Holdings-ի հաշվին: Միևնույն ժամանակ, 2017 թվականին հոլանդացի «դուստրը» միայն 3,4 մլն եվրո հարկ է վճարել:
Reuters-ը այս տվյալները ստացել է Նիդեռլանդների Առևտրի պալատից և հարցում է արել Google-ին:
Կորպորացիան պատասխանել է, որ «մենք, ինչպես և մյուս բազմազգ ընկերությունները, վճարում ենք մեր կորպորատիվ եկամտահարկի մեծամասնությունը հայրենիքում, և վերջին տասը տարիների ընթացքում մենք վճարել ենք համաշխարհային արդյունավետ հարկի 26%-ի չափով … Մենք վճարում ենք բոլոր հարկերը՝ համապատասխան յուրաքանչյուր երկրի հարկային օրենքների», – ասել է Google- ը:
Այս սխեման հայտնի է, և հինգ տարի առաջ Իռլանդիան Բրյուսելի և Վաշինգտոնի ճնշման ներքո որոշեց, որ հաջորդ տարի այլևս «կրկնակին» չի տրամադրի Google-ին: Այժմ հերթը հոլանդական «սենդվիչինն է»:
